ທ່ານນາງເທເຣຊາ ເມ ນາຍົກລັດຖະມົນຕີອັງກິດໄດ້ກ່າວປາໄສກ່ຽວກັບຫຼັກໝັ້ນຂອງປະເທດຕົນໃນການເຈລະຈາຖອນອອກຈາກສະຫະພາບເອີຣົບ ຫຼື EU ຢູ່ນະຄອນຫຼວງລອນດອນໃນວັນທີ 17 ມັງກອນນີ້ ເຊິ່ງເປັນການສະແດງທ່າທີຄັ້ງທຳອິດຂອງລັດຖະບານອັງກິດຕໍ່ຂັ້ນຕອນການຖອນອອກຈາກອີຢູ ຫຼັງຮັບເອົາປະຊາມະຕິແລະຕົກລົງຖອນອອກຈາກອີຢູເມື່ອເດືອນມິຖຸນາປີຜ່ານມາ ເຮັດໃຫ້ວົງການພາຍນອກສົນໃຈເປັນຢ່າງຍິ່ງ.
ທ່ານນາງເທເຣຊາ ເມ ກ່າວວ່າ: ໃນການເຈລະຈາກັບສະຫະພາບເອີຣົບ, ປະເທດຕົນຈະບໍ່ສະແຫວງຫາການເຊັນສັນຍາໃດໆ ທີ່ໃຫ້ອັງກິດ "ເຄິ່ງຖອນເຄິ່ງຢູ່ໄວ້". ແນວໃດກໍດີ ອັງກິດຈະສ້າງ "ສາຍພົວພັນສະເໝີພາບແບບໃໝ່" ກັບສະຫະພາບເອີຣົບ ແລະຖ້າອັງກິດບໍ່ຖອນອອກຈາກຕະຫຼາດຮ່ວມ ກໍບໍ່ສາມາດເວົ້າວ່າໄດ້ຖອນອອກຈາກສະຫະພາບເອີຣົບຢ່າງແທ້ຈິງ.
ໃນການກ່າວປາໄສດັ່ງກ່າວ, ທ່ານນາງເທເຣຊາ ເມ ບໍ່ໄດ້ສະແດງທ່າທີຂອງຕົນຕໍ່ບັນຫາທີ່ອັງກິດຈະສືບຕໍ່ຢູ່ໃນສະຫະພັນດ່ານພາສີສະຫະພາບເອີຣົບ ຫຼື ບໍ່ ໂດຍພຽງແຕ່ກ່າວຫວັງວ່າອັງກິດຈະສາມາດບັນລຸສັນຍາດ່ານພາສີກັບປະເທດໃນສະຫະພາບເອີຣົບ. ຂະນະດຽວກັນກໍບໍ່ໄດ້ເວົ້າລະອຽດກວ່ານີ້ອີກ.
