ວັນທີ 17 ມັງກອນນີ້, ທ່ານ ສີຈິ້ນຜິງ ປະທານປະເທດຈີນໄດ້ພົບປະກັບທ່ານ ຄລາວສ໌ ຊີວາບ ປະທານເວທີປຶກສາຫາລືເສດຖະກິດໂລກຢູ່ເມືອງດາວົດສ໌ປະເທດສະວິສ.
ທ່ານ ສີຈິ້ນຜິງ ກ່າວວ່າ: ປັດຈຸບັນ, ການຮ່ວມມືລະຫວ່າງຈີນກັບເວທີປຶກສາຫາລືເສດຖະກິດໂລກນັບມື້ເພີ່ມຂຶ້ນແລະອຸດົມສົມບູນຂຶ້ນ ທັງໄດ້ຮັບໝາກຜົນນັບມື້ຫຼາຍຂຶ້ນ. ເວທີປຶກສາຫາລືດາວົສ໌ລະດູຮ້ອນໄດ້ຈັດຂຶ້ນ 10 ຄັ້ງດ້ວຍຜົນສຳເລັດ ເຊິ່ງໄດ້ສ້າງອິດທິພົນໃນໂລກນັບມື້ກວ້າງຂວາງ. ແນວໃດກໍດີເຊື່ອວ່າຈາກຄວາມເອົາໃຈໃສ່ແລະການຊຸກຍູ້ຈາກປະທານຄລາວສ໌ ຊີວາບ, ອະນາຄົດຂອງການຮ່ວມມືລະຫວ່າງຈີນກັບເວທີປຶກສາຫາລືເສດຖະກິດໂລກຈະນັບມື້ນັບສົດໃສຂຶ້ນ.
ທ່ານ ຊີວາບ ກ່າວສະແດງຄວາມຂອບໃຈອີກເທື່ອໜຶ່ງຕໍ່ທ່ານປະທານສີຈິ້ນຜິງທີ່ໄດ້ກ່າວປາຖະກະຖາທີ່ມີຄວາມໝາຍເລິກເຊິ່ງ ແລະ ຈີນໄດ້ ສະໜັບສະໜູນອັນລ້ຳຄ່າໃຫ້ແກ່ເວທີປຶກສາຫາລືເສດຖະກິດໂລກ ໂດຍເວທີນີ້ກໍຍິນດີເພີ່ມທະວີການພົວພັນຄູ່ຮ່ວມມືກັບຈີນ,ຮ່ວມກັນສຸມທຸກຄວາມພະຍາຍາມເພື່ອຊຸກຍູ້ການແກ້ໄຂບັນຫາໂລກ.
ຫຼັງການພົບປະ,ທ່ານ ສີຈິ້ນຜິງ ແລະ ທ່ານ ຄລາວສ໌ ຊີວາບ ໄດ້ຮ່ວມກັນເປັນສັກຂີພິຍານໃນການເຊັນ "ບົດບັນທຶກຄວາມເຂົ້າໃຈລະຫວ່າງຄະນະກຳມະການການພັດທະນາແລະປະຕິຮູບແຫ່ງລັດຈີນກັບເວທີປຶກສາຫາລືເສດຖະກິດໂລກກ່ຽວກັບການລົງເລິກການຮ່ວມມືດ້ານຍຸດທະສາດຢ່າງຮອບດ້ານ".
 |
