ຕາມຂ່າວCRI: ກິດຈະກຳຕ້ອນຮັບບຸນກຸດຈີນແລະແລກປ່ຽນການຮ່ວມມືລະຫວ່າງຈີນ-ອາຊຽນປີ 2017 ທີ່ສະພາການຄ້າຈີນ-ອາຊຽນ ແລະ ຄະນະກຳມະການປັກກິ່ງ-ອາຊຽນໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 17 ມັງກອນນີ້ ໂດຍເອກອັກຄະລັດຖະທູດແລະຜູ້ຕາງໜ້າຂອງບັນດາປະເທດອາຊຽນປະຈຳຈີນໄດ້ເຂົ້າຮ່ວມແລະປຶກສາຫາລືກ່ຽວກັບການຮ່ວມມື.
ໃນກິດຈະກຳໄດ້ຈັດ "ພິທີມອບລາງວັນປະກວດວິສາຫະກິດຈີນທີ່ເຂົ້າສູ່ອາຊຽນແລະວິສາຫະກິດອາຊຽນທີ່ເຂົ້າສູ່ຈີນ" ປະຈຳປີ ໂດຍກຸ່ມບໍລິສັດເບຍລາວໄດ້ຮັບ "ລາງວັນວິສາຫະກິດອາຊຽນເຂົ້າສູ່ຈີນທີ່ດີເດັ່ນປະຈຳປີ 2016". ທ່ານ ສູ້ນິງນິງ ປະທານຄະນະບໍລິຫານງານຂອງສະພາການຄ້າຈີນ-ອາຊຽນໄດ້ສະເໜີ 3 ຂໍ້ກ່ຽວກັບການຮ່ວມມືລະຫວ່າງຈີນ-ອາຊຽນໃນປີ 2017 ກໍຄືໃນອະນາຄົດ ຄືໜຶ່ງ,ສອງຝ່າຍຄວນຈັດຕັ້ງປະຕິບັດຄວາມຮັບຮູ້ຢ່າງເປັນເອກະພາບ ພ້ອມທັງເພີ່ມຄວາມຮັບຮູ້ໃໝ່ຢ່າງບໍ່ຢຸດຢັ້ງ,ພ້ອມກັນຊຸກຍູ້ຂະບວນການເສດຖະກິດຂອງພາກພື້ນໃຫ້ເຊື່ອມໂຍງເຂົ້າກັນ, ຮ່ວມກັນຊຸກຍູ້ການສ້າງເສັ້ນທາງສາຍໄໝທາງທະເລບົນພື້ນຖານການປຶກສາຫາລື,ກໍ່ສ້າງແລະຊົມໃຊ້ຮ່ວມກັນ; ສອງ, ການຮ່ວມມືລະຫວ່າງສອງຝ່າຍຄວນໄດ້ຮັບການເພີ່ມທະວີແລະກ້າວເຂົ້າສູ່ລວງເລິກ ເຊິ່ງລວມທັງການເລັ່ງລັດປັບປຸງກົນໄກການຮ່ວມມືທີ່ມີຢູ່ໃນປັດຈຸບັນໃຫ້ດີຂຶ້ນພ້ອມທັງເສີມຂະຫຍາຍບົດບາດໃຫ້ດີ,ເພີ່ມທະວີແລະປັບປຸງການຮ່ວມມືໃນຂະແໜງການທີ່ກ່ຽວຂ້ອງໃຫ້ອຸດົມສົມບູນຂຶ້ນ ເພື່ອໃຫ້ສອດຄ່ອງກັບຄວາມສົນໃຈຂອງສອງຝ່າຍແລະຍົກສູງປະສິດທິພາບການຮ່ວມມື ແລະ ສາມ,ນັກທຸລະກິດຂອງສອງຝ່າຍຄວນກຳແໜ້ນທ່າອ່ຽງແຫ່ງການຮ່ວມມືທີ່ເປັນປະໂຫຍດຢ່າງຕັ້ງໜ້າ, ພັດທະນາການຮ່ວມມືກັນ,ຄວນເສີມຂະຫຍາຍບົດບາດປະດິດສ້າງໃໝ່ຂອງນັກທຸລະກິດຢ່າງເຕັມສ່ວນເພື່ອຮ່ວມມືທາງເສດຖະກິດຂອງພາກພື້ນໃຫ້ສົດໃສຂຶ້ນຕື່ມ.