ອົງການສະຫະປະຊາຊາດໄດ້ເຜີຍແຜ່ບົດລາຍງານວິໄສທັດສະພາບເສດຖະກິດໂລກ 2017 ໃນວັນທີ 17 ມັງກອນນີ້ໂດຍຊີ້ໃຫ້ເຫັນວ່າ: ເຖິງວ່າເສດຖະກິດໂລກຂະຫຍາຍຕົວຢ່າງຊັກຊ້າ,ການຄ້າແລະການລົງທຶນໃນທົ່ວໂລກຊຸດໂຊມກໍຕາມ, ແຕ່ເສດຖະກິດອາຊີປີນີ້ຄາດວ່າຈະຮັກສາທ່ວງທ່າຂະຫຍາຍຕົວຢ່າງແຂງແຮງແລະສືບຕໍ່ກາຍເປັນຈຸດເດັ່ນຂອງເສດຖະກິດໂລກ.
ບົດລາຍງານສະບັບດັ່ງກ່າວລະບຸວ່າ: ເນື່ອງຈາກຄວາມຮຽກຮ້ອງຕ້ອງການດ້ານການອຸປະໂພກແລະບໍລິໂພກເຂັ້ມແຂງແລະລາຍຈ່າຍຂອງລັດຖະບານໄດ້ທົດແທນຜົນເສຍຫາຍຈາກຄວາມບໍ່ພຽງພໍດ້ານການສົ່ງອອກ ຈິ່ງເຮັດໃຫ້ເສດຖະກິດອາຊີຕາເວັນອອກແລະອາຊີໃຕ້ໃນປີ2016ຜ່ານມາເຕີບໂຕໃນລະດັບ 5,7% ເຊິ່ງເທົ່າກັບປີ 2015.
ບົດລາຍງານສະແດງໃຫ້ເຫັນວ່າ: ອາຊີໃຕ້ເປັນເຂດໜຶ່ງທີ່ເສດຖະກິດເຕີບໂຕໄວທີ່ສຸດໃນທົ່ວໂລກ ໂດຍປີ 2016 ເພີ່ມຂຶ້ນ 6,7%ແລະຄາດວ່າປີນີ້ແລະປີໜ້າຈະເຕີບໂຕເຖິງ 6,9%ແລະເນື່ອງຈາກການສົ່ງອອກກວມອັດຕາສ່ວນບໍ່ຫຼາຍໃນເສດຖະກິດຂອງອິນເດຍ ຈິ່ງຈະໄດ້ຮັບຜົນກະທົບໜ້ອຍຈາກການປ່ຽນແປງດ້ານການຄ້າແລະການລົງທຶນທົ່ວໂລກ ເຊິ່ງຄາດວ່າປີນີ້ເສດຖະກິດອິນເດຍຈະເຕີບໂຕ 7,7%, ປີໜ້າ 7,6%.
 |
