ວັນທີ 18 ມັງກອນນີ້, ທ່ານສີຈິ້ນຜີງ, ປະທານປະເທດຈີນໄດ້ເຂົ້າຮ່ວມກອງປະຊຸມລະດັບສູງຢູ່ວັງນານາຊາດເຊີແນວໃນຫົວຂໍ້ "ຮ່ວມກັນປຶກສາຫາລືແລະສ້າງປະຊາຄົມຮ່ວມຊະຕາກຳຂອງມະນຸດ", ແລະໄດ້ສະແດງວິໄສທັດໃນຫົວຂໍ້ "ຮ່ວມກັນສ້າງປະຊາຄົມຮ່ວມຊະຕາກຳຂອງມະນຸດ".
ໃນການປາຖະກະຖາດັ່ງກ່າວ, ທ່ານສີຈິ້ນຜີງຊີ້ໃຫ້ເຫັນວ່າ, ຈີນຍຶດໝັ້ນຄວາມສະເໝີພາບດ້ານອະທິປະໄຕ, ພວກເຮົາຄວນຊຸກຍູ້ສາຍພົວພັນສາກົນຫັນເປັນແບບປະຊາທິປະໄຕ, ບໍ່ຄວນເຮັດແບບ "ປະເທດດຽວເປັນເຈົ້າໂລກ" ຫຼື "ຫຼາຍຝ່າຍຄຸ້ມຄອງຮ່ວມກັນ". ຊະຕາກຳຂອງໂລກຄວນໃຫ້ປະເທດຕ່າງໆໃນໂລກຮ່ວມກັນກຳ, ຫຼັກເກນສາກົນຄວນໃຫ້ປະເທດຕ່າງໆຮ່ວມກັນກຳນົດ, ວຽກງານທົ່ວໂລກຄວນໃຫ້ປະເທດຕ່າງໆຮ່ວມກັນຄວບຄຸມແລະຜົນຂອງການພັດທະນາຄວນໃຫ້ປະເທດຕ່າງໆແບ່ງປັນຮ່ວມກັນ.
ທ່ານສີຈິ້ນຜີງກ່າວຕື່ມວ່າ, ປະຊາຄົມໂລກຄວນຍຶດໝັ້ນການປຶກສາຫາລື, ເພື່ອສ້າງໂລກທີ່ມີສັນຕິພາບຍາວນານ. ຍຶດໝັ້ນຮ່ວມກັນກໍ່ສ້າງທົ່ວໂລກແລະແບ່ງປັນຜົນສຳເລັດຮ່ວມກັນ, ເພື່ອສ້າງໂລກທີ່ມີຄວາມໝັ້ນຄົງທົ່ວໄປ. ຍຶດໝັ້ນການຮ່ວມມືແລະຕ່າງຝ່າຍຕ່າງມີຜົນປະໂຫຍດ, ເພື່ອສ້າງໂລກທີ່ມີຄວາມຈະເລີນຮຸ່ນເຮືອງຮ່ວມກັນ. ຍຶດໝັ້ນການແລກປ່ຽນແລະຖອດຖອນບົດຮຽນເຊິ່ງກັນແລະກັນ, ເພື່ອສ້າງໂລກທີ່ເປີດປະຕູແລະກວມລວມ. ຍຶດໝັ້ນສີຂຽວແລະລະບາຍກາກບອນໜ້ອຍ, ເພື່ອສ້າງໂລກທີ່ສະອາດແລະສວຍງາມ.
ຂະນະດຽວກັນທ່ານສີຈິ້ນຜີງຍັງໄດ້ຍົກໃຫ້ເຫັນຄວາມຕັດສິນໃຈທີ່ "ບໍ່ມີການປ່ຽນແປງ" ສີ່ດ້ານຕາມນະໂຍບາຍຂອງຈີນຄື: ໜຶ່ງ, ຄວາມຕັດສິນໃນການຮັກສາສັນຕິພາບໂລກ. ສອງ, ຄວາມຕັດສິນໃຈຊຸກຍູ້ການພັດທະນາຮ່ວມກັນ. ສາມ, ຄວາມຕັດສິນໃຈສ້າງສາຍພົວພັນຄູ່ຮ່ວມມື. ແລະສີ່, ຄວາມຕັດສິນໃຈຍຶດໝັ້ນລັດທິຫຼາຍຝ່າຍ.
ຕອນທ້າຍ, ທ່ານສີຈິ້ນຜີງໄດ້ກ່າວວ່າ, ໃນຖານະທີ່ຈີນແມ່ນປະເທດສະມາຊິກເລີ່ມສ້າງອົງການສະຫະປະຊາຊາດ, ຈະສືບຕໍ່ຮັກສາແລະຊຸກຍູ້ອົງການສະຫະປະຊາຊາດເສີມຂະຫຍາຍບົດບາດໃຈກາງໃນວຽກງານສາກົນໃນອະນາຄົດ, ຄວາມແຮງທີ່ຈີນສະໜັບສະໜູນລັດທິຫຼາຍຝ່າຍກໍຈະນັບມື້ນັບຫຼາຍຂຶ້ນໄປຕາມການພັດທະນາຢ່າງຕໍ່ເນື່ອງຂອງຕົນ.