ຂ່າວສານຊິນຮວາລາຍງານວ່າ: ວັນທີ 18 ມັງກອນນີ້, ທ່ານວູໄຫເທົ່າ ຮອງຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງຮັກສາຂະບວນການປະຕິບັດສັນຍາຮອບດ້ານວ່າດ້ວຍບັນຫານິວເຄຼຍອີຣານ.
ໃນມື້ດຽວກັນ, ສະພາຄວາມໝັ້ນຄົງສະຫະປະຊາຊາດໄດ້ຈັດກອງປະຊຸມເປີດເຜີຍກ່ຽວກັບບັນຫານິວເຄຼຍອີຣານ ໂດຍທ່ານວູໄຫເທົ່າກ່າວວ່າ: ເຖິງວ່າ 1 ປີຜ່ານມາ, ສັນຍາຮອບດ້ານວ່າດ້ວຍບັນຫານິວເຄຼຍອີຣານໄດ້ບັນລຸຄວາມຄືບໜ້າ, ແຕ່ຍັງຜະເຊີນໜ້າກັບຄວາມຫຍຸ້ງຍາກ ແລະສິ່ງທ້າທາຍ ເຊິ່ງແຕ່ລະປະເທດຕ້ອງໄດ້ພະຍາຍາມຮ່ວມກັນ.
ທ່ານກ່າວຕື່ມວ່າ: ຝ່າຍຕ່າງໆຕ້ອງຖືເອົາສັນຍາຮອບດ້ານເປັນທິດທາງຫຼັກການ ທັງຕ້ອງປະຕິບັດຕາມສັນຍານີ້ຢ່າງເຂັ້ມງວດ ເພື່ອບັນລຸຄຳໝັ້ນສັນຍາຢ່າງຈິງໃຈ. ຂະນະດຽວກັນ, ແຕ່ລະຝ່າຍຄວນຮັກສາເຈຕະນາດີ, ປຶກສາຫາລືຢ່າງສະເໝີພາບ, ແກ້ໄຂຂໍ້ຂັດແຍ້ງຢ່າງເໝາະສົມ ເພື່ອຊອກຫາວິທີແກ້ໄຂແບບຍາວນານ ເຊິ່ງຖ້າເຮັດໄດ້ແນວນີ້ ກໍຈະສາມາດຊຸກຍູ້ສົ່ງເສີມສັນຍາຮອບດ້ານໄດ້ຢ່າງໝັ້ນຄົງຍາວນານ.