ວັນທີ 19 ມັງກອນນີ້ໄດ້ເປີດເສັ້ນທາງທ່ອງທ່ຽວແຕ່ເມືອງເປີຍໄຫ ເຂດກວາງຊີ ສປ ຈີນ ຫາອ່າວຮ່າລອງ ສສ ຫວຽດນາມ ຢ່າງເປັນທາງການ ເຊິ່ງເປັນເສັ້ນທາງທ່ອງທ່ຽວຫວຽດນາມທີ່ສະດວກທີ່ເຂດກວາງຊີເປີດບໍລິການອີກເສັ້ນໜຶ່ງ.
ທ່ານເຫວີນຈ້າວປິ່ງ ປະທານບໍລິສັດທ່ອງທ່ຽວແລະຂົນສົ່ງຊິ່ນຊ້າງຢິວເປີຍໄຫຈຳກັດ ກ່າວວ່າ: ນັບແຕ່ເລີ່ມທົດລອງເປີດບໍລິການເສັ້ນທາງທ່ອງທ່ຽວດັ່ງກ່າວເມື່ອເດືອນພະຈິກປີກາຍເປັນຕົ້ນມາ ນັບລວມແລ້ວໄດ້ຂົນສົ່ງຜູ້ໂດຍສານກວ່າ 3.000 ເທື່ອຄົນ ທັງນີ້ເສັ້ນທາງທ່ອງທ່ຽວຂ້າມຊາດໄດ້ຮັບຄວາມນິຍົມສົມຄວນ ແລະປັດຈຸບັນມີນັກທ່ອງທ່ຽວຈຳນວນຫຼາຍໄດ້ຈອງປີ້ລົດໄວ້ສຳລັບໄລຍະບຸນກຸດຈີນແລ້ວ.
ຄຽງຄູ່ກັບເຂດຮ່ວມມືເສດຖະກິດທົ່ວອ່າວເປີຍປູ້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ, ການທ່ອງທ່ຽວເຂດຊາຍແດນຈີນ-ຫວຽດນາມໄດ້ກາຍເປັນຜະລິດຕະພັນທ່ອງທ່ຽວທີ່ໄດ້ຮັບຄວາມນິຍົມສົມຄວນ ປັດຈຸບັນ, ບໍ່ພຽງແຕ່ຢູ່ເມືອງຕົ່ງຊິ່ງ ແລະ ເມືອງເປີຍໄຫເທົ່ານັ້ນ, ຢູ່ດ່ານຊາຍແດນແຫ່ງຕ່າງໆຂອງເຂດກວາງຊີ ເປັນຕົ້ນ ເມືອງຈິ້ງຊີ, ເມືອງຜິງສຽງ ແລະ ເມືອງຫຼົງໂຈ່ວ ກໍໄດ້ເປີດບໍລິການທ່ອງທ່ຽວເຊັ່ນກັນ.
