ກົມໄປສະນີແຫ່ງຊາດຈີນປະກາດໃນວັນທີ 19 ມັງກອນນີ້ວ່າ: ປີຜ່ານມາ, ຂະແໜງການຈັດສົ່ງສິນຄ້າດ່ວນຂອງປະເທດຕົນສາມາດບັນລຸການຈັດສົ່ງໄດ້ເຖິງ 31 ຕື້ 350 ລ້ານຫໍ່ ເພີ່ມຂຶ້ນ 51,7% ເມື່ອທຽບໃສ່ປີ 2015 ແລະປະລິມານໜ້າວຽກໃນຂະແໜງການດັ່ງກ່າວຄອງອັນດັບໜຶ່ງຂອງໂລກ.
ຕາມສະຖິຕິບໍ່ເປັນທາງການ ຜູ້ປະກອບການຂະແໜງການກ່ຽວພັນເຖິງການຄ້າທາງເອເລັກໂຕຣນິກແລະການຈໍລະຈອນສິນຄ້າໃນທົ່ວປະເທດຈີນໄດ້ລື່ນ 2 ລ້ານ 3 ໝື່ນຄົນແລ້ວ. ຂະນະທີ່ທ່ານເກິງຢ້ຽນ ເຈົ້າໜ້າທີ່ຫ້ອງການຕິດຕາມຄົ້ນຄວ້າຕະຫຼາດ ສູນຄົ້ນຄວ້າການພັດທະນາກົມໄປສະນີແຫ່ງຊາດ ກ່າວວ່າ: ຕົວເລກດັດຊະນີຕ່າງໆ ເປັນຕົ້ນ ຂະໜາດການພັດທະນາແລະການເຜີຍແຜ່ຂອງຂະແໜງການດັ່ງກ່າວໄດ້ສະແດງໃຫ້ເຫັນວ່າ ຂະແໜງການດັ່ງກ່າວຂອງຈີນຍັງຢູ່ໃນໄລຍະພັດທະນາເຕີບໂຕຢ່າງວ່ອງໄວ.
ທ່ານເກິງຢ້ຽນ ກ່າວຕື່ມວ່າ: ຂະແໜງການຈັດສົ່ງສິນຄ້າດ່ວນໃນຖານະເປັນສ່ວນປະກອບສຳຄັນຂອງຂະແໜງການບໍລິການທັນສະໄໝ ໄດ້ກາຍເປັນແບບຢ່າງຂອງເສດຖະກິດໃໝ່ຈີນ.