ຂ່າວສານຊິນຮວາລາຍງານວ່າ: ທ່ານລິວເຈີນມິນ ຮອງລັດຖະມົນຕີກະຊວງການຕ່າງປະເທດຈີນໄດ້ຢ້ຽມຢາມຟິລິບປິນ ທັງໄດ້ດຳເນີນການເຈລະຈາດ້ານການຕ່າງປະເທດຄັ້ງທີ 20 ໂດຍຮ່ວມເປັນປະທານກັບທ່ານມະນາໂຣ ຮອງລັດຖະມົນຕີກະຊວງການຕ່າງປະເທດຟິລິບປິນ, ຂະນະດຽວກັນກໍໄດ້ເຂົ້າຢ້ຽມຄຳນັບທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນແຕ່ວັນທີ 17 ຫາ 18 ມັງກອນນີ້.
ທ່ານດູເຕີເຕ ກ່າວວ່າ: ນັບແຕ່ຂ້າພະເຈົ້າໄປຢ້ຽມຢາມຈີນໃນປີຜ່ານມາ, ສາຍພົວພັນສອງປະເທດໄດ້ພັດທະນາຢ່າງຮອບດ້ານທີ່ໜ້າເພິງພໍໃຈ. ຂ້າພະເຈົ້າຈະເດີນທາງໄປປັກກິ່ງເພື່ອເຂົ້າຮ່ວມເວທີປຶກສາຫາລືສຸດຍອດການຮ່ວມມືສາກົນກ່ຽວກັບຂໍ້ລິເລີ່ມໜຶ່ງແລວທາງໜຶ່ງເສັ້ນທາງໃນເດືອນພຶດສະພາປີນີ້ ແລະຄອງຄອຍພົບປະກັບທ່ານສີຈິນຜິງ ປະທານປະເທດຈີນອີກເທື່ອໜຶ່ງ.
ທ່ານລິວເຈີນມິນກ່າວວ່າ: ຈີນຍິນດີຈັດຕັ້ງປະຕິບັດຄວາມເຫັນເປັນເອກະພາບກັນທີ່ສຳຄັນລະຫວ່າງຜູ້ນຳສອງປະເທດ ເພື່ອຊຸກຍູ້ສົ່ງເສີມການຮ່ວມມືໃນຂົງເຂດຕ່າງໆໃຫ້ມີປະສິດທິຜົນໂດຍໄວ ແລະສ້າງຄວາມຜາສຸກໃຫ້ປະຊາຊົນສອງປະເທດ.
 |
