ພິທີສຳເລັດການກໍ່ສ້າງອາຄານຫ້ອງການຂອງປະທານສະພາສູງກຳປູເຈຍທີ່ໄດ້ຮັບການຊ່ວຍເຫຼືອຈາກລັດຖະບານຈີນໄດ້ຈັດຂຶ້ນໃນວັນທີ 20 ມັງກອນນີ້ຢູ່ນະຄອນຫຼວງພະນົມເປັນປະເທດກຳປູເຈຍໂດຍສົມເດັດໄຊຊົມ ປະທານສະພາສູງກຳປູເຈຍ, ທ່ານສົງໂປ່ ເອກອັກຄະລັດຖະທູດຈີນປະຈຳກຳປູເຈຍໄດ້ກ່າວປາໄສແລະຕັດແຖບຜ້າ ແລະສະມາຊິກສະພາ, ເຈົ້າໜ້າທີ່ລັດຖະບານ,ຜູ້ຕາງໜ້າວົງການຕ່າງໆໃນສັງຄົມກຳປູເຈຍພ້ອມດ້ວຍຜູ້ຕາງໜ້າບໍລິສັດຈີນຢູ່ກຳປູເຈຍເກືອບ 500 ຄົນເຂົ້າຮ່ວມ.
ທ່ານເອກອັກຄະລັດຖະທູດສົງໂປຢືນຢັນວ່າ: ການໄປມາຫາສູ່ກັນລະຫວ່າງສະພາເປັນສ່ວນປະກອບສຳຄັນຂອງສາຍພົວພັນຈີນ-ກຳປູເຈຍ ແລະອາຄານທີ່ເປັນຮູບແບບກຳປູເຈຍນີ້ຈະກາຍເປັນສັນຍະລັກແຫ່ງມິດຕະພາບຈີນ-ກຳປູເຈຍທີ່ມີມູນເຊື້ອອີກຢ່າງໜຶ່ງ.
ໂອກາດກ່າວປາໄສໃນພິທີດັ່ງກ່າວ,ສົມເດັດໄຊຊົມໄດ້ຕາງໜ້າໃຫ້ລັດຖະສະພາ, ລັດຖະບານແລະປະຊາຊົນກຳປູເຈຍສະແດງຄວາມຂອບໃຈຕໍ່ລັດຖະບານແລະປະຊາຊົນຈີນທີ່ໃຫ້ການຊ່ວຍເຫຼືອຢ່າງເອື້ອເຟື້ອເຜື່ອແຜ່ແກ່ການພັດທະນາໃນຂົງເຂດຕ່າງໆຂອງກຳປູເຈຍ ທັງຕີລາຄາສູງຕໍ່ຄຸນນະພາບການກໍ່ສ້າງແລະສິ່ງອຳນວຍຄວາມສະດວກຄົບຊຸດຂອງໂຄງການກໍ່ສ້າງອາຄານດັ່ງກ່າວ ແລະຢືນຢັນວ່າ ລັດຖະສະພາແລະລັດຖະບານກຳປູເຈຍຈະລົງເລິກແລະເສີມຂະຫຍາຍສາຍພົວພັນລະຫວ່າງສອງປະເທດຢ່າງບໍ່ຢຸດຢັ້ງ ແລະເຊີດຊູມິດຕະພາບກຳປູເຈຍ-ຈີນທີ່ເປັນມູນເຊື້ອໃຫ້ແຕກດອກອອກຜົນຍິ່ງໆຂຶ້ນແລະສືບທອດຕະຫຼອດໄປທຸກເຊັ່ນຄົນ.