ວັນທີ 21 ມັງກອນນີ້, ຮ້ານອາຫານຢູ່ເຂດຕາເວັນອອກຂອງນະຄອນຢາງກຸ້ງປະເທດມຽນມາໄດ້ເກີດໄຟໄໝ້ ໂດຍເຫດການດັ່ງກ່າວໄດ້ເຮັດໃຫ້ພະນັກງານໃນຮ້ານ 5 ຄົນເສຍຊີວິດ ແລະ 1 ຄົນບາດເຈັບ.
ອັກຄີໄພດັ່ງກ່າວເກີດຂຶ້ນໃນເວລາປະມານ 4 ໂມງ 35 ນາທີຂອງວັນທີ 21 ມັງກອງນີ້ ຂະນະທີ່ເຈົ້າໜ້າທີ່ກອງດັບເພີງຢາງກຸ້ງກ່າວວ່າ: ຖັງອາຍແກັສທຳມະຊາດຢູ່ເຮືອນຄົວຂອງຮ້ານຮົ່ວອອກໄຫຼໃສ່ໄຟຈຶ່ງເກີດເຫດການດັ່ງກ່າວ. ຂະນະເກີດເຫດມີພະນັກງານ 5 ຄົນພວມນອນຢູ່ຮ້ານແລະພາຍຫຼັງໄດ້ເສຍຊີວິດເນື່ອງດ້ວຍຫາຍໃຈຝືດຈາກການດູດຄວັນໄຟ, ສ່ວນຜູ້ບາດເຈັບໜຶ່ງຄົນໄດ້ນຳສົ່ງໄປປິ່ນປົວຢູ່ໂຮງໝໍແລ້ວ.
ເຈົ້າໜ້າທີ່ກ່ຽວຂ້ອງໃຫ້ຮູ້ວ່າ:ຕຳຫຼວດຢາງກຸ້ງໄດ້ກັກຕົວເຈົ້າຂອງຮ້ານແລະຈະສືບສວນເຫດການຕາມກົດລະບຽບກົດໝາຍ.