ວັນທີ 20 ມັງກອນນີ້, ມະຫາວິທະຍາໄລກະສິກຳເຢຈິນຂອງມຽນມາໄດ້ເຊັນສັນຍາຮ່ວມມືຍຸດທະສາດກັບກຸ່ມບໍລິສັດຢຸນທ່ຽນຮວ້າຈີນຈຳກັດຢູ່ເມືອງຄຸນໝິງແຂວງຢຸນນານ ໂດຍໃນສັນຍາດັ່ງກ່າວໄດ້ລະບຸວ່າ:ສອງຝ່າຍຈະໃຊ້ທ່າແຮງດ້ານຊັບພະຍາກອນຂອງຕົນຢ່າງເຕັມສ່ວນ ພ້ອມກັນຊຸກຍູ້ຂະບວນການຫັນກະສິກຳມຽນມາເປັນທັນສະໄໝ.
ຕາມສັນຍາຮ່ວມມື,ກຸ່ມບໍລິສັດຢຸນທ່ຽນຮວ້າຈີນຈຳກັດຈະນຳເອົາເຕັກໂນໂລຊີດ້ານກະສິກຳທີ່ທັນສະໄໝຂອງຈີນກໍຄືຂອງໂລກໄປເຜີຍແຜ່ຢູ່ມຽນມາ,ພ້ອມທັງສະໜອງສູນປະຕິບັດຕົວຈິງດ້ານການຄົ້ນຄວ້າວິທະຍາສາດໃຫ້ແກ່ມະຫາວິທະຍາໄລກະສິກຳເຢຈິນ, ສ່ວນມະຫາວິທະຍາໄລກະສິກຳເຢຈິນຈະສະໜັບສະໜູນບຸກຄະລາກອນໃຫ້ແກ່ບໍລິສັດຢຸນທ່ຽນຮວ້າໃນການພັດທະນາຕະຫຼາດກະສິກຳມຽນມາ.
ເຈົ້າໜ້າທີ່ມະຫາວິທະຍາໄລກ່າວວ່າ: ມຽນມາເປັນປະເທດກະສິກຳ ໂດຍປະຊາກອນກວມ 60% ໃນທົ່ວປະເທດມີອາຊີບກະສິກຳ. ເຖິງວ່າມູນຄ່າການຜະລິດ ກະສິກຳກວມ 30% ຂອງຍອດມູນຄ່າການຜະລິດພາຍໃນປະເທດ(GDP),ແຕ່ການພັດທະນາກະສິກຳຍັງຫຼ້າຫຼັງ ຈາກນີ້ຈຶ່ງໄດ້ມີຄວາມມຸ່ງຫວັງທີ່ສຸດຕໍ່ການຮ່ວມມືລະຫວ່າງມະຫາວິທະຍາໄລຂອງຕົນກັບບໍລິສັດຢຸນທ່ຽນຮວ້າຈີນເພື່ອບັນລຸຕາມເປົ້າໝາຍດັ່ງກ່າວ.
 |
