ຕາມຂ່າວສານຊິນຮວາ: ທ່ານ ອີມັດ ຮາມມິສ ນາຍົກລັດຖະມົນຕີຊີຣີກ່າວໃນວັນທີ 22 ມັງກອນນີ້ວ່າ, ລັດຖະບານຕົນຍິນດີຕໍ່ທຸກຂໍ້ລິເລີ່ມທີ່ມີຜົນດີຕໍ່ການຟື້ນຟູສັນຕິພາບແລະສະຖຽນລະພາບທີ່ຈະສະເໜີໃນການເຈລະຈາສັນຕິພາບຢູ່ນະຄອນຫຼວງອັສທານາປະເທດກາຊັກສະຖານໃນວັນທີ 23 ມັງກອນນີ້.
ທ່ານ ຮາມມິສ ໄດ້ໃຫ້ສຳພາດຕໍ່ສື່ມວນຊົນໃນມື້ດຽວກັນວ່າ, ລັດຖະບານຕົນມີຄວາມພ້ອມແລະຕັ້ງໃຈຕໍ່ການເຈລະຈາສັນຕິພາບຄັ້ງນີ້ ເຊິ່ງເປັນການເຈລະຈາໂດຍກົງແບບ "ເຊິ່ງໜ້າ" ຄັ້ງທຳອິດລະຫວ່າງສອງຝ່າຍນັບແຕ່ເກີດວິກິດການຊີຣີເກືອບ 6 ປີຜ່ານມາ. ແນວໃດກໍດີ, ລັດຖະບານຕົນຍິນດີຕໍ່ທຸກຂໍ້ລິເລີ່ມທີ່ມີລັກສະນະສ້າງສັນໃນການຟື້ນຟູສັນຕິພາບແລະສະຖຽນລະພາບຂອງປະເທດ.
ຜູ້ຕາງໜ້າລັດຖະບານ, ພັກຝ່າຍຕໍ່ຕ້ານຕົ້ນຕໍຂອງຊີຣີ ແລະທູດພິເສດບັນຫາຊີຣີຂອງອົງການສະຫະປະຊາຊາດ ພ້ອມດ້ວຍຜູ້ຕາງໜ້າຂອງຣັດເຊຍ, ຕວກກີ ແລະອີຣານ ເຊິ່ງເປັນສາມຝ່າຍສ້າງການເຈລະຈາຄັ້ງນີ້ ຈະເຂົ້າຮ່ວມການເຈລະຈາ, ຂະນະທີ່ທ່ານ ຈອດ ໂຄຣນ ເອກອັກຄະລັດຖະທູດອາເມລິກາປະຈຳກາຊັກສະຖານ ກໍຈະເຂົ້າຮ່ວມໃນນາມເປັນຜູ້ສັງເກດການເຊັ່ນດຽວກັນ.