ຂະບວນລົດໄຟສາກົນຈີນ-ຫວຽດນາມຖ້ຽວ T8702 ແຕ່ນະຄອນຫຼວງຮ່າໂນ້ຍ ຫວຽດນາມຫາເມືອງໜານໜິງເຂດກວາງຊີ ສປ ຈີນ ໄດ້ເລີ່ມບໍລິການຜູ້ໂດຍສານໃນໄລຍະບຸນກຸດຈີນ ໂດຍໃນວັນທີ 23 ມັງກອນນີ້, ຢູ່ຂະບວນລົດໄຟມີຜູ້ໂດຍສານໃຊ້ບໍລິການຢ່າງໜາແໜ້ນ.
ທ່ານຢາງຫຼິວເສິງ ຫົວໜ້າກອງລົດສາກົນຂົນສົ່ງຜູ້ໂດຍສານໜານໜິງ ພະແນກທາງລົດໄຟໜານໜິງຈີນ ໄດ້ໃຫ້ສຳພາດຕໍ່ນັກຂ່າວວ່າ: ໃນຂະບວນລົດໄຟຖ້ຽວ T8701 ຈາກເມືອງໜານໜິງໄປສູ່ ຢາເລິມ ນະຄອນຫຼວງຮ່າໂນ້ຍ ໃນວັນທີ 22 ມັງກອນນີ້ມີຜູ້ໂດຍສານ 110 ຄົນ ແລະໃນໄລຍະນີ້ໄດ້ມີຜູ້ໂດຍສານເຂົ້າອອກເມືອງເປັນຈຳນວນຫຼາຍໃຊ້ບໍລິການຂະບວນລົດໄຟສາກົນຈີນ-ຫວຽດນາມ. ຂະນະດຽວກັນ ໃນໄລຍະ 10 ວັນຜ່ານມານັ້ນ, ຂະບວນລົດໄຟດັ່ງກ່າວສາມາດບໍລິການຂົນສົ່ງຜູ້ໂດຍສານໄດ້ແລ້ວ 2.024 ເທື່ອຄົນ.
ທ່ານຢາງຫຼິວເສິງ ກ່າວຕື່ມວ່າ: ສຳລັບປີ້ລົດໄຟ ແຕ່ເມືອງໜານໜິງ ຫາ ຢາເລິມຮ່າໂນ້ຍ ມີລາຄາພຽງແຕ່ 215 ຢວນເທົ່ານັ້ນ. ທີ່ສຳຄັນ, ນັບແຕ່ເປີດບໍລິການຕະຫຼອດ 8 ປີຜ່ານມາ, ຂະບວນລົດໄຟດັ່ງກ່າວໄດ້ອຳນວຍຄວາມສະດວກໃຫ້ແກ່ການຄ້າ, ການທ່ອງທ່ຽວ ແລະ ການຢ້ຽມຢາມຍາດຕິພີ່ນ້ອງລະຫວ່າງປະຊາຊົນສອງຊາດຈີນແລະຫວຽດນາມໄດ້ເປັນຢ່າງດີ.
