ເຈົ້າໜ້າທີ່ຂັ້ນສູງຂອງໂຄງການໂຮງໄຟຟ້າອາຍແກັສທຳມະຊາດທາເກຕາ ນະຄອນຢາງກຸ້ງ ທີ່ຈີນແລະມຽນມາຮ່ວມລົງທຶນກໍ່ສ້າງ ກ່າວວ່າ: ໂຮງໄຟຟ້າດັ່ງກ່າວຈະເລີ່ມສະໜອງໄຟຟ້າໃຫ້ແກ່ນະຄອນຢາງກຸ້ງແລະແຂວງຢາງກຸ້ງກ່ອນທ້າຍປີນີ້ ເຊິ່ງຈະເປັນການແກ້ໄຂການຂາດເຂີນໄຟຟ້າໃຊ້ຢູ່ເຂດດັ່ງກ່າວໄດ້ສ່ວນໃດໜຶ່ງ.
ທ່ານຕົງຝານ ຜູ້ອຳນວຍການໃຫຍ່ປະຈຳໂຄງການໂຮງໄຟຟ້າທາເກຕາ ກ່າວໃນວັນທີ 22 ມັງກອນນີ້ວ່າ: ກຳລັງຕິດຕັ້ງເຄື່ອງຈັກຜະລິດໄຟຟ້າຂອງໂຄງການນີ້ຈະບັນລຸ 72 ເມກາວັດກ່ອນທ້າຍປີນີ້ ແລະ ຈະເພີ່ມຂຶ້ນອີກ 34 ເມກາວັດເມື່ອຮອດເດືອນກຸມພາປີໜ້າ ເຊິ່ງເປັນເປົ້າໝາຍການກໍ່ສ້າງ ໄລຍະໜຶ່ງຂອງໂຄງການ.
ທ່ານຕົງຝານ ກ່າວຕື່ມວ່າ: ມຽນມາມີປະລິມານສະສົມອາຍແກັສທຳມະຊາດຢ່າງຫຼວງຫຼາຍ, ຂະນະທີ່ການຜະລິດໄຟຟ້າດ້ວຍອາຍແກັສທຳມະຊາດກໍແມ່ນຮູບການຜະລິດໄຟຟ້າທີ່ອ່າວເໝາະສົມກັບເງື່ອນໄຂຂອງປະເທດນີ້ໃນປັດຈຸບັນ ແລະກໍແມ່ນຮູບການສະໜອງພະລັງງານໄຟຟ້າທີ່ໄດ້ຮັບການເຫັນດີຈາກລັດຖະບານແລະປະຊາຊົນມຽນມາ.
ໂຮງໄຟຟ້າດັ່ງກ່າວຕັ້ງຢູ່ພາກຕາເວັນອອກເມືອງຢາງກຸ້ງ ຫ່າງຈາກໃຈກາງເມືອງ 10 ກິໂລແມັດ ແລະຫ່າງຈາກເຂດເສດຖະກິດພິເສດທີລາວາ 16 ກິໂລແມັດ.