ທ່ານໂດນັນ ທຣຳ ປະທານາທິບໍດີອາເມລິກາໄດ້ລົງນາມໃນລັດຖະດຳລັດໃນວັນທີ 23 ມັງກອນນີ້ໂດຍປະກາດຢ່າງເປັນທາງການວ່າ ອາເມລິກາຖອນອອກຈາກສັນຍາຄູ່ຮ່ວມຂ້າມປາຊີຟິກຫຼື TPPແລະຫຼັງອາເມລິກາຖອນອອກຈາກTPPແລ້ວຈະເຮັດໃຫ້ສັນຍາດັ່ງກ່າວຕົກຢູ່ໃນຄວາມອັດຕະຄັດທີ່ບໍ່ສາມາດເກີດຜົນສັກສິດໄດ້. ສ່ວນການສະແດງທ່າທີທາງການຫຼ້າສຸດຈາກປະເທດສະມາຊິກອື່ນໆຂອງTPPສະແດງໃຫ້ເຫັນວ່າ ປະເທດສະມາຊິກເຫຼົ່ານີ້ມີຄວາມເຫັນຂັດແຍ້ງກັນເມື່ອຮັບມືຫຼັງອາເມລິກາຖອນອອກຈາກTPP.ແນວໃດກໍດີ, ສະມາຊິກຄະນະລັດຖະບານຍີ່ປຸ່ນຢືນຢັນວ່າ: ຍີ່ປຸ່ນຈະສືບຕໍ່ຍາດແຍ່ງເອົາຄວາມເຂົ້າໃຈຂອງອາເມລິກາ.
ທ່ານມານໂຄມ ເຕີນບູນ ນາຍົກລັດຖະມົນຕີອົສຕຣາລີຢືນຢັນຕໍ່ສື່ມວນຊົນໃນວັນທີ 24 ມັງກອນນີ້ວ່າ: TPPສອດຄ່ອງກັບຜົນປະໂຫຍດຂອງອົສຕຣາລີແລະຍີ່ປຸ່ນ ສະນັ້ນຈິ່ງອາດຈະສືບຕໍ່ສົ່ງເສີມສັນຍານີ້ໃນກໍລະນີທີ່ອາເມລິກາຖອນອອກ. ຂະນະດຽວກັນກໍມີຫຼາຍປະຕິກິລິຍາທີ່ຕ່າງຈາກຍີ່ປຸ່ນແລະອົສຕຣາລີໂດຍຫຼາຍປະເທດສະມາຊິກTPPເປັນຕົ້ນ ແມັກຊິກ,ຈີເລ, ນີວຊີແລນແລະອື່ນໆກຳລັງຕັ້ງໜ້າພິຈາລະນາປັບປຸງນະໂຍບາຍຂອງຕົນ.
ກະຊວງການຄ້າແລະອຸດສາຫະກຳສິງກະໂປໄດ້ອອກຖະແຫຼງການໃນວັນທີ 24 ມັງກອນນີ້ວ່າ: ສິງກະໂປຈະສືບຕໍ່ມີສ່ວນຮ່ວມໃນສັນຍາການຄ້າເສລີພາກພື້ນອື່ນໆເຊິ່ງລວມທັງRCEP, ເຂດການຄ້າເສລີອາຊີປາຊີຟິກຫຼື FTAAP ແລະອື່ນໆ ທັງພະຍາຍາມເຊື່ອມໂຍງເຂົ້າເປັນໜຶ່ງດຽວກັນຂອງພາກພື້ນ ພ້ອມທັງຈະຮ່ວມກັບປະເທດສະມາຊິກອື່ນໆຂອງTPP ສືບຕໍ່ຄົ້ນຄວ້າວ່າຈະຊຸກຍູ້ສັນຍາTPPແນວໃດ.
 |
