ເຮືອລຳໜຶ່ງທີ່ເຊື່ອວ່າບັນທຸກຊາວອົບພະຍົບອິນໂດເນເຊຍຜິດກົດໝາຍ ໄດ້ຫຼົ້ມຢູ່ເຂດທະເລໃກ້ມາເລເຊຍຫວ່າງມໍ່ໆນີ້ນັ້ນ ມີຂ່າວຢືນຢັນວ່າ ມີ 10 ຄົນເສຍຊີວິດ ແລະ ປະມານ 30 ຄົນຫາຍສາບສູນ ໃນເຫດການດັ່ງກ່າວ.
ເຈົ້າໜ້າທີ່ປະຕິບັດກົດໝາຍທາງທະເລມາເລເຊຍ ຢືນຢັນວ່າ: ຕອນເຊົ້າວັນທີ 23 ມັງກອນນີ້ ໄດ້ພົບສົບຜູ້ປະສົບເຄາະຮ້າຍ 10 ສົບຢູ່ຫາດຊາຍແຫ່ງໜຶ່ງແຄມທະເລພາກຕາເວັນອອກປະເທດຕົນ. ຂະນະທີ່ໂຄສົກຂະແໜງປະຕິບັດກົດໝາຍທາງທະເລ ກໍກ່າວໂດຍເຊື່ອວ່າ ເຮືອທີ່ເກີດເຫດຫຼົ້ມລຳນີ້ໄດ້ບັນທຸກຊາວອົບພະຍົບອິນໂດເນເຊຍຜິດກົດໝາຍປະມານ 40 ຄົນ.
ຂ່າວແຈ້ງວ່າ, ເຮືອລຳດັ່ງກ່າວໄດ້ຫຼົ້ມກາງທາງຂະນະແລ່ນຈາກອິນໂດເນເຊຍໄປສູ່ມາເລເຊຍ ແລະຫຼັງເກີດເຫດມີຜູ້ໂດຍສານ 2 ຄົນໄດ້ຮັບການຊ່ວຍເຫຼືອແລະສົ່ງໄປໂຮງໝໍ. ປັດຈຸບັນ ພາກສ່ວນທີ່ກ່ຽວຂ້ອງກຳລັງເລັ່ງຄົ້ນຫາຜູ້ຫາຍສາບສູນ, ຂະນະທີ່ຂະແໜງການປະຕິບັດກົດໝາຍທາງທະເລມາເລເຊຍ ຢືນຢັນວ່າ: ສາເຫດພາໃຫ້ເກີດເຫດເຮືອຫຼົ້ມເທື່ອນີ້ເນື່ອງຈາກບັນທຸກນ້ຳໜັກເກີນກຳນົດທັງປະສົບສະພາບນ້ຳທະເລທີ່ປ່ຽນແປງຕະຫຼອດ.