ຜູ້ແທນຣັດເຊຍ, ຕວກກີ ແລະ ອີຣານ ໄດ້ອອກຖະແຫຼງການຮ່ວມຢູ່ນະຄອນຫຼວງອາສຕານາ ປະເທດກາຊັກສະຖານໃນວັນທີ 24 ມັງກອນນີ້ ໂດຍລະບຸວ່າ ຈະສ້າງກົນໄກປະສົມສາມຝ່າຍເພື່ອຕິດຕາມການຢຸດຍິງຢູ່ຊີຣີ.
ຂ່າວແຈ້ງວ່າ, ຫຼັງຜູ້ແທນຂອງ 3 ປະເທດດັ່ງກ່າວໄດ້ປຶກສາຫາລືເປັນການພາຍໃນຢູ່ອາສຕານາໃນວັນດັ່ງກ່າວແລ້ວກໍໄດ້ອອກຖະແຫຼງການຮ່ວມ ໂດຍລະບຸວ່າ: ຣັດເຊຍ, ຕວກກີ ແລະ ອີຣານ ພ້ອມສະໜັບສະໜູນລັດຖະບານຊີຣີແລະກຸ່ມປະກອບອາວຸດຕໍ່ຕ້ານລັດຖະບານເຈລະຈາກັນຢູ່ອາສຕານາ ທັງຮຽກຮ້ອງໃຫ້ປະຊາຄົມໂລກຈົ່ງສະໜັບສະໜູນຂະບວນການການເມືອງຂອງຊີຣີ ເພື່ອຈັດຕັ້ງປະຕິບັດມະຕິທີ່ກ່ຽວຂ້ອງກັບບັນຫາຊີຣີຂອງສະພາຄວາມໝັ້ນຄົງອົງການສະຫະປະຊາຊາດ. ຖະແຫຼງການຍັງຊີ້ອອກວ່າ: ຈະບໍ່ສາມາດແກ້ໄຂບັນຫາຊີຣີໄດ້ດ້ວຍກຳລັງອາວຸດ ແລະການແກ້ໄຂບັນຫາດັ່ງກ່າວມີແຕ່ຜ່ານຊ່ອງທາງການເມືອງ ບົນພື້ນຖານຈັດຕັ້ງປະຕິບັດມະຕິຕົກລົງຂອງສະພາຄວາມໝັ້ນຄົງຢ່າງສົມບູນເທົ່ານັ້ນ.
ນອກນີ້, 3 ປະເທດດັ່ງກ່າວຍັງສະໜັບສະໜູນຝ່າຍຕ້ານລັດຖະບານຊີຣີເຂົ້າຮ່ວມການເຈລະຈາສັນຕິພາບກ່ຽວກັບບັນຫາຊີຣີທີ່ຈະຈັດຂຶ້ນຢູ່ນະຄອນເຊີແນວໃນວັນທີ 8 ກຸມພາໜ້ານີ້.
