ໜັງສືພິມ Universal Daily News ຂອງໄທສະບັບວັນທີ 24 ມັງກອນນີ້ລາຍງານວ່າ: ທ່ານພົນເອກປຣະວິດ ວົງສຸວັນ ຮອງນາຍົກລັດຖະມົນຕີທັງເປັນລັດຖະມົນຕີກະຊວງປ້ອງກັນປະເທດໄທຢືນຢັນວ່າ ປີນີ້,ໄທຈະຊື້ກຳປັ່ນດຳນ້ຳລຳທຳອິດຈາກຈີນດ້ວຍຮູບແບບ "ລັດຕໍ່ລັດ"ມູນຄ່າ 13 ຕື້ 500 ລ້ານບາດ ຫຼັງໄດ້ຮັບການອະນຸມັດຈາກສະພານິຕິບັນຍັດແຫ່ງຊາດແລ້ວ.
ທ່ານປຣະວິດຢືນຢັນວ່າ ນ່ານທະເລຂອງໄທອຸດົມສົມບູນໄປດ້ວຍຊັບພະຍາກອນທຳມະຊາດໂດຍສະເພາະເຂດທະເລອັນດາມັນ, ຈາກນີ້,ໄທຕ້ອງມີກຳລັງຕົວຈິງໃນການປົກປັກຮັກສາຊັບພະຍາກອນແລະອຳນາດອະທິປະໄຕອັນຄົບຖ້ວນ. ຂະນະທີ່ປະເທດອ້ອມຂ້າງຕ່າງກໍມີກຳປັ່ນດຳນ້ຳແລ້ວ ແລະໄທກໍຕ້ອງມີກອງກຳປັ່ນດຳນ້ຳຂອງຕົນເຊັ່ນດຽວກັນ.
ເຈົ້າໜ້າທີ່ທະຫານໄທຢືນຢັນວ່າ ແຜນຈັດຊື້ດັ່ງກ່າວບໍ່ພຽງແຕ່ຈະໄດ້ຮັບກຳປັ່ນດຳນ້ຳເທົ່ານັ້ນ, ຍັງຈະໄດ້ຮັບປໂຫຍດຫຼາຍດ້ານຈາກຈີນເປັນຕົ້ນການຝຶກອົບຮົມບຸກຄະລາກອນ, ອາວຸດຍຸດໂທປະກອນຕິດກຳປັ່ນດຳນ້ຳ, ເຕັກນິກ ແລະການຮັກສາສ້ອມແປງທັງຈະຮັບປະກັນການນຳໃຊ້ແລະການປັບປຸງເປັນເວລາ 6 ປີ.