ສະຖານທູດຈີນປະຈຳມາເລເຊຍ ໄດ້ຈັດງານລ້ຽງຕ້ອນຮັບບຸນກຸດຈີນປີລະກາ ຢູ່ນະຄອນຫຼວງກົວລາລຳເປີໃນຕອນຄ່ຳວັນທີ 25ມັງກອນນີ້.
ທ່ານຫວງຮຸ້ຍຄ່າງ ເອກອັກຄະລັດຖະທູດຈີນປະຈຳມາເລເຊຍ ໄດ້ກ່າວປາໄສວ່າ: ໃນໜຶ່ງປີຜ່ານມາ, ຄວາມໄວ້ເນື້ອເຊື່ອໃຈທາງການເມືອງລະຫວ່າງຈີນແລະມາເລເຊຍໄດ້ເຂົ້າສູ່ລວງເລິກຢ່າງບໍ່ຢຸດຢັ້ງ, ການຮ່ວມມືເສດຖະກິດການຄ້າໄດ້ຮັບໝາກຜົນຢ່າງຫຼວງຫຼາຍ, ການແລກປ່ຽນດ້ານວັດທະນະທຳກໍເພີ່ມຂຶ້ນເລື້ອຍໆ ແລະ ການຮ່ວມມືດ້ານການປ້ອງກັນປະເທດແລະການປະຕິບັດກົດໝາຍກໍມີຄວາມຄືບໜ້າພົ້ນເດັ່ນຫຼາຍຂຶ້ນ. ປັດຈຸບັນ, ສາຍພົວພັນລະຫວ່າງສອງປະເທດໄດ້ເຂົ້າສູ່ໄລຍະພັດທະນາຢ່າງສົມບູນ, ໜັກແໜ້ນ, ວ່ອງໄວ ແລະ ຮອບດ້ານ ທັງຢືນຢູ່ແຖວໜ້າຂອງການພົວພັນລະຫວ່າງຈີນແລະປະເທດອື່ນໆໃນອາຊຽນ.
ທ່ານຫວງຮຸ້ຍຄ່າງ ກ່າວຕື່ມວ່າ: ຈີນເປັນຄູ່ຄ້າໃຫຍ່ອັນດັບໜຶ່ງຂອງມາເລເຊຍ 7 ປີຕໍ່ເນື່ອງ ໂດຍປີຜ່ານມາພຽງເດືອນທັນວາເດືອນດຽວ, ມູນຄ່າການຄ້າລະຫວ່າງສອງຝ່າຍໄດ້ບັນລຸເຖິງ 9 ຕື້ 890 ລ້ານໂດລາສະຫະລັດ ເປັນສະຖິຕິສູງສຸດສຳລັບມູນຄ່າການຄ້າພຽງເດືອນດຽວໃນຊຸມປີຜ່ານມາ. ຂະນະທີ່ຈີນແລະມາເລເຊຍຮ່ວມສ້າງ "ໜຶ່ງແລວທາງໜຶ່ງເສັ້ນທາງ" ນັ້ນ ກໍໄດ້ຮັບໝາກຜົນແບບຕ່າງຝ່າຍຕ່າງມີຜົນປະໂຫຍດໃນເບື້ອງຕົ້ນ. ທັງນີ້ຈຶ່ງເວົ້າໄດ້ວ່າ ການຮ່ວມມືລະຫວ່າງຈີນ-ມາເລເຊຍໄດ້ເປັນແບບຢ່າງແຫ່ງຄວາມສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ.
