ອາເມລິກາໄດ້ສະແດງທ່າທີຫຼ້າສຸດຂອງຕົນຕໍ່ການປາບປາມຢາເສບຕິດຢ່າງແຂງແຮງຂອງທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນ ທັນທີ ຫຼັງທ່ານໂດນັນ ທຣຳ ຂຶ້ນຮັບຕຳແໜ່ງປະທານາທິບໍດີ. ທັງນີ້ ໜັງສືພິມ "ເດິຟິລິບປິນສະຕາ" ສະບັບວັນທີ 25 ມັງກອນນີ້ລາຍງານວ່າ, ທ່ານຊຸງກິມ ເອກອັກຄະລັດຖະທູດອາເມລິກາປະຈຳປະເທດຕົນກ່າວວ່າ: ລັດຖະບານອາເມລິກາສະໜັບສະໜູນລັດຖະບານຟິລິບປິນຕໍ່ຕ້ານໄພຂົ່ມຂູ່ຈາກຢາເສບຕິດ ເຊິ່ງຕ່າງຈາກຫຼັກໝັ້ນຂອງລັດຖະບານໂອບາມາຫຼາຍທີ່ສຸດ.
ທັງນີ້, ທ່ານຊຸງກິມ ໄດ້ໃຫ້ສຳພາດຕໍ່ນັກຂ່າວຢູ່ນະຄອນຫຼວງມະນີລາ ປະເທດຟິລິບປິນໃນວັນທີ 24 ມັງກອນນີ້ວ່າ: ອາເມລິກາແລະຟິລິບປິນໄດ້ຮ່ວມມືກັນຢ່າງແໜ້ນແຟ້ນໃນການປາບປາມການຄ້າຂາຍຢາເສບຕິດ ແລະອາເມລິກາກໍສະໜັບສະໜູນຟິລິບປິນປາບປາມຢາເສບຕິດ. ຂະນະທີ່ຕົນກໍເຂົ້າໃຈທ່ານດູເຕີເຕທີ່ເລັ່ງການປາບປາມຢາເສບຕິດ ແລະອາເມລິກາກໍຫວັງວ່າຈະສືບຕໍ່ຮ່ວມມືກັບຟິລິບປິນໃນຂົງເຂດທີ່ກ່ຽວຂ້ອງ.
