ຕາມຂ່າວ CRI: ພາຍຫຼັງອາເມລິກາປະກາດຖອນອອກຈາກສັນຍາຄູ່ຮ່ວມຂ້າມປາຊີຟິກ ຫຼື TPP, ຫວຽດນາມເຊິ່ງເປັນປະເທດທີ່ໄດ້ລົງນາມສັນຍາດັ່ງກ່າວໄດ້ສະແດງທາທີຂອງຕົນຕໍ່ກໍລະນີດັ່ງກ່າວເມື່ອມໍ່ໆມານີ້.
ທ່ານເລໄຫບິງ, ໂຄສົກກະຊວງການຕ່າງປະເທດຫວຽດນາມກ່າວວ່າ, ໃນ 6 ປີຜ່ານມານີ້, 12 ປະເທດສະມາຊິກຂອງ TPP ໄດ້ພະຍາຍາມເຈລະຈາແລະສຳເລັດການລົງນາມສັນຍາດັ່ງກ່າວ.ຖ້າວ່າສັນຍາດັ່ງກ່າວໄດ້ຮັບການປະຕິບັດ, ຈະສາມາດຕອບສະໜອງຜົນປະໂຫຍດຮ່ວມກັນຂອງບັນດາປະເທດສະມາຊິກແລະຈະມີຄວາມໝາຍສຳຄັນຕໍ່ການຮ່ວມມືເສດຖະກິດ, ເຊື່ອມຈອດກັນ, ຄວາມໝັ້ນທ່ຽງແລະຈະເລີນຮຸ່ງເຮືອງຂອງເຂດອາຊີປາຊີຟິກ.
ພາຍຫຼັງທ່ານໂດນັນ ທຣຳ ປະທານາທິບໍດີອາເມລິກາປະກາດຖອນອອກຈາກ TPP ແລ້ວ,ຫວຽດນາມຈະສືບຕໍ່ປະຕິບັດພາລະກິດການປະຕິຮູບຂອງຕົນ, ເພີ່ມທະວີວຽກງານກະກຽມເພື່ອຮັບປະກັນປະຕິບັດຕາມຄຳໝັ້ນສັນຍາຂອງສັນຍາການຄ້າເສລີຕ່າງໆທີ່ໄດ້ລົງນາມແລະຈະລົງນາມແລ້ວໃນອະນາຄົດ.