ຕາມຂ່າວ CRI: ສະຖານທູດຈີນປະຈຳລາວໄດ້ຈັດງານລ້ຽງຮັບຮອງປີໃໝ່ຈີນແລະງານລ້ຽງອຳລາຂອງທ່ານກວນຮວາປິ່ງ, ເອກອັກຄະລັດຖະທູດຈີນປະຈຳລາວຢູ່ໂຮງແຮມດອນຈັນພາເລດ ນະຄອນຫຼວງວຽງຈັນໃນວັນທີ 25 ມັງກອນນີ້, ໂດຍທ່ານໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ທ່ານກິແກ້ວ ໄຂຄຳພິທູນ, ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ທ່ານພົນຕີ ສົມແກ້ວ ສີລະວົງ ຄະນະເລຂາທິການສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ, ຄະນະທູຕານຸທູດ, ຜູ້ຕາງໜ້າອົງການຈັດຕັ້ງສາກົນປະຈຳລາວພ້ອມດ້ວຍຊາວຈີນຢູ່ລາວແລະຊາວລາວເຊື້ອສາຍຈີນເຂົ້າຮ່ວມ.
ໂອກາດດັ່ງກ່າວ, ທ່ານກວນຮວາປິ່ງໄດ້ສະແດງຄວາມຢື້ຢາມຖາມຂ່າວແລະອວຍພອນອັນປະເສີດບັນດາຊາວຈີນຢູ່ລາວແລະຊາວລາວເຊື້ອສາຍຈີນໃນໂອກາດປີໃໝ່ຈີນ. ປີຜ່ານມາສອງປະເທດຈີນ-ລາວໄດ້ບັນລຸໝາກຜົນໃນການສ້າງເສດຖະກິດ-ສັງຄົມຢ່າງຫຼວງຫຼາຍ, ແລະສາຍພົວພັນລະຫວ່າງສອງປະເທດກໍຂະຫຍາຍຕົວຢ່າງຕໍ່ເນື່ອງ.
ທ່ານກວນຮວາປິ່ງ ກ່າວວ່າ, ຕະຫຼອດໄລຍະປະຕິບັດໜ້າທີ່ຢູ່ລາວ 3 ປີຜ່ານມາ, ຂ້າພະເຈົ້າໄດ້ອຸທິດເທື່ອແຮງຂອງຕົນ, ເພື່ອຊຸກຍູ້ມິດຕະພາບທີ່ເປັນມູນເຊື້ອແລະກ່ານຮ່ວມມືຕົວຈິງຂອງສອງຊາດ, ແລະຈາກຄວາມເອົາໃຈໃສ່ແລະສົ່ງເສີມຂອງການນຳສອງຊາດ, ສາຍພົວພັນມິດຕະພາບແລະຄູ່ຮ່ວມມືຍຸດທະສາດຮອບດ້ານລະຫວ່າງສອງລັດໄດ້ເຂົ້າສູ່ລວງເລິກ, ໂດຍເຫັນໄດ້ຈາກການຮ່ວມມືດ້ານເສດຖະກິດການຄ້າມີທ່າອ່ຽງທີ່ດີຂຶ້ນ, ຈີນໄດ້ກາຍເປັນປະເທດລົງທຶນແລະປະເທດຊ່ວຍເຫຼືອລາວໃຫຍ່ອັນດັບ 1 ແລະຄູ່ການຄ້າອັນດັບ 2 ຂອງປະເທດລາວ. ທີ່ພົ້ນເດັ່ນສອງຝ່າຍໄດ້ບັນລຸການກໍ່ສ້າງເສັ້ນທາງລົດໄຟລາວ-ຈີນ,ດາວທຽມລາວ 1, ການພັດທະນາຂົງເຂດການປ້ອງກັນຊາດ, ປ້ອງກັນຄວາມສະຫງົບ, ການສຶກສາ, ວັດທະນະທຳສາທາລະນະສຸກ, ເຕັກໂນໂລຊີເປັນຕົ້ນ. ນອກນີ້, ທັງສອງປະເທດຍັງສືບຕໍ່ປະສານງານຢ່າງໃກ້ຊິດໃນວຽກງານພາກພື້ນແລະສາກົນ, ເຊິ່ງສາມາດສ້າງໄດ້ບົດບາດຕັ້ງໜ້າໃນການຮັກສາສັນຕິພາບແລະຄວາມໝັ້ນຄົງຂອງພາກພື້ນແລະສາກົນ. ຂ້າພະເຈົ້າຮູ້ສຶກດີໃຈເປັນຢ່າງໃຫຍ່ແລະກໍເຊື່ອໝັ້ນວ່າຈາກການພະຍາຍາມຮ່ວມຂອງສອງປະເທດ, ມິດຕະພາບແລະການຮ່ວມມືລະຫວ່າງຈີນ-ລາວຈະປະສົບຜົນສຳເລັດໃຫຍ່ຫຼວງກວ່າເກົ່າຢ່າງແນ່ນອນ.
ໃນໂອກາດດັ່ງກ່າວ, ສະຖາບັນຂົງຈື້ຂອງມະຫາວິທະຍາໄລແຫ່ງຊາດລາວ, ໂຮງຮຽນລຽວໂຕວ໌ແລະອົງການຈັດຕັ້ງອື່ນໆໄດ້ສະແດງສິລະປະວັນນະຄະດີໂດຍການສະແດງມວຍກົງຟູຈີນແລະອື່ນໆ.