ຕາມຂ່າວCRI: ວັນທີ 27 ມັງກອນນີ້, ທ່ານກວນຮວາປິ່ງ ເອກອັກຄະລັດຖະທູດຈີນປະຈຳລາວໄດ້ເຂົ້າພົບທ່ານທອງລຸນ ສີສຸລິດ, ກຳມະການກົມການເມືອງສູນກາງພັກປະຊາຊົນປະຕິວັດລາວ, ນາຍົກລັດຖະມົນຕີລາວເພື່ອອຳລາ.
ທ່ານທອງລຸນ ຕີລາຄາສູງຕໍ່ທ່ານກວນຮວາປິ່ງທີ່ໄດ້ປະກອບສ່ວນສຳຄັນເຂົ້າໃນການຊຸກຍູ້ຂະຫຍາຍສາຍພົວພັນລະຫວ່າງສອງປະເທດແລະການຮ່ວມມືຢ່າງແທ້ຈິງໃນໄລຍະດຳລົງຕຳແໜ່ງຢູ່ລາວ. ເຫັນວ່າລາວຈີນໄດ້ກາຍເປັນປະຊາຄົມຮ່ວມຊະຕາກຳທີ່ໝັ້ນແກ່ນ.
ທ່ານກວນຮວາປິ່ງ ໄດ້ຂອບໃຈນຳທ່ານທອງລຸນທີ່ເຫັນພ້ອມຕໍ່ວຽກງານຂອງສະຖານທູດຈີນປະຈຳລາວກໍຄືຂອງຕົນ, ຮູ້ສຶກພາກພຸມໃຈທີ່ໄດ້ເຂົ້າຮ່ວມການຊຸກຍູ້ມິດຕະພາບທີ່ມີມູນເຊື້ອແລະຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ, ເຊື່ອວ່າພາຍໃຕ້ຄວາມເອົາໃຈໃສ່ແລະການຊຸກຍູ້ຂອງຜູ້ນຳພັກແລະລັດສອງປະເທດ, ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ລາວໃນສະໄໝໃໝ່ຈະໄດ້ຮັບໝາກຜົນອຸດົມສົມບູນກວ່າເກົ່າຢ່າງແນ່ນອນ. ຕໍ່ໜ້າຕົນຈະເກັບຄວາມຊົງຈຳຢູ່ລາວອັນດີງາມຢ່າງທະນຸຖະໜອມ, ແລະຈະເອົາໃຈໃສ່ນຳປະເທດລາວແຕ່ຕົ້ນຕະຫຼອດປາຍ, ທຳຄວາມພະຍາຍາມຢ່າງສຸດຂີດເພື່ອຊຸກຍູ້ຂະຫຍາຍສາຍພົວພັນລະຫວ່າງສອງປະເທດ.
ໃນໂອກາດນີ້, ທ່ານທອງລຸນຍັງກ່າວວ່າ, ໃນຫຼາຍປີມານີ້, ສາຍພົວພັນລະຫວ່າງລາວກັບຈີນໄດ້ຂະຫຍາຍລົງສູ່ລວງເລິກຢ່າງບໍ່ຢຸດຢັ້ງ, ຜູ້ນຳສອງປະເທດພົບປະກັນຢ່າງຫຼວງຫຼາຍ, ການຮ່ວມມືໃນຂົງເຂດຕ່າງໆໄດ້ຮັບໝາກຜົນທີ່ປະຈັກຕາຊາວໂລກ. ລາວຂອບໃຈນຳພັກ, ລັດແລະປະຊາຊົນຈີນທີ່ໃຫ້ການສະໜັບສະໜູນແລະການຊ່ອຍເຫຼືອອັນລ້ຳຄ່າໃຫ້ແກ່ການພັດທະນາຂອງລາວໃນໄລຍະຍາວນານ. ໃນຖານະເປັນສະຫາຍທີ່ດີແລະເພື່ອນມິດທີ່ດີ, ລາວດີໃຈທີ່ໄດ້ເຫັນກຳລັງແຫ່ງຊາດຂອງຈີນໄດ້ເພີ່ມຂຶ້ນຢ່າງຕໍ່ເນື່ອງແລະຊີວິດການເປັນຢູ່ຂອງປະຊາຊົນຈີນນັບມື້ນັບດີຂຶ້ນ, ຊົມເຊີຍຜົນງານຂອງຈີນທີ່ໄດ້ຮັບພາຍໃຕ້ການນຳທີ່ສະຫຼາດສ່ອງໄສຂອງພັກກອມມູຈິດຈີນຢ່າງຈິງໃຈ. ລາວໄດ້ຖືຜົນງານຂອງຈີນທີ່ໄດ້ຮັບເປັນແບບຢ່າງແລະແມ່ແຮງໃນການພັດທະນາຂອງຕົນ, ເຊື່ອວ່າຈີນຈະໄດ້ຮັບຜົນສຳເລັດທີ່ພົ້ນເດັ່ນກວ່າເກົ່າຢ່າງແນ່ນອນ.
ໃນເວລາກ່າວເຖິງທາງລົດໄຟລາວ-ຈີນ, ທ່ານທອງລຸນກ່າວວ່າ, ທາງລົດໄຟລາວ-ຈີນແມ່ນປະຈັກຕາຂອງຄົນ. ຫວ່າງກ່ອນນີ້ບໍ່ດົນ, ໃນໂອກາດພົບປະກັບນັກທຸລະກິດໄທ, ໄທໄດ້ອວຍພອນຕໍ່ລາວທີ່ຈະມີທາງລົດໄຟຂອງຕົນໃນໄວໆນີ້. ທ່ານທອງລຸນຊີ້ໃຫ້ເຫັນວ່າ, ທາງລົດໄຟລາວ-ຈີນບໍ່ພຽງແຕ່ເຊື່ອມຕໍ່ລາວກັບຈີນເທົ່ານັ້ນ, ຍັງຈະເຊື່ອມຕໍ່ກັບປະເທດອາຊຽນອື່ນໆຕື່ມອີກ,ບໍ່ພຽງແຕ່ແມ່ນໂອກາດພັດທະນາຂອງລາວ, ຂະນະດຽວກັນນັ້ນກໍແມ່ນໂອກາດພັດທະນາຂອງອາຊຽນ. ທ່ານທອງລຸນຄອງຄອຍຂີ່ລົດໄຟຄວາມໄວສູງໄປຢ້ຽມຢາມປະເທດຈີນຈາກນະຄອນຫຼວງວຽງຈັນ.
