ກອງປະຊຸມອຸດສາຫະກຳການຄ້າເຢຍລະມັນຫຼື DIHK ປະກາດຜົນການຄິດໄລ່ຫຼ້າສຸດໃນວັນທີ 27 ມັງກອນນີ້ເຫັນວ່າ, ຈີນໄດ້ກາຍເປັນຄູ່ການຄ້າໃຫຍ່ອັນດັບທີໜຶ່ງຂອງເຢຍລະມັນເປັນຄັ້ງທຳອິດໃນປີຜ່ານມາ.
ມື້ດຽວກັນ, ທ່ານໂວເຄີ ເທຣເອີ, ຮອງຜູ້ອຳນວຍການໃຫຍ່ຂອງ DIHK ທີ່ຮັບຜິດຊອບວຽກງານການຄ້າຕໍ່ຕ່າງປະເທດກ່າວຕໍ່ສື່ມວນຊົນເຢຍລະມັນວ່າ, ຈີນໄດ້ເຂົ້າແທນທີ່ອາເມລິກາແລະກາຍເປັນຄູ່ການຄ້າໃຫຍ່ສຳຄັນທີ່ສຸດຂອງເຢຍລະມັນເປັນຄັ້ງທຳອິດ. ຕາມຜົນການຄິດໄລ່ຂອງ DIHK, ປີຜ່ານມາອາເມລິກາແມ່ນຄູ່ການຄ້າໃຫຍ່ອັນດັບທີ 3 ຂອງປະເທດຕົນ, ຝລັ່ງແມ່ນຄູ່ການຄ້າໃຫຍ່ອັນດັບທີ 2.
ກ່ອນໜ້ານີ້, ຈີນແມ່ນຄູ່ການຄ້າທີ່ໃຫຍ່ທີ່ສຸດຂອງເຢຍລະມັນໃນອາຊີ, ເຢຍລະມັນກໍເປັນຄູ່ການຄ້າໃຫຍ່ອັນດັບທີ 1 ຂອງຈີນໃນສະຫະພາບເອີລົບຫຼາຍປີລຽນຕິດ. ອີງຕາມຕົວເລກສະຖິຕິທີ່ກົມພາສີຈີນປະກາດໃນເດືອນນີ້, ຍອດມູນຄ່າການຄ້າສອງຝ່າຍລະຫວ່າງຈີນກັບເຢຍລະມັນໃນປີ 2016 ບັນລຸເຖິງ 999 ຕື້ 100 ລ້ານຢວນ, ທຽບໃສ່ໄລຍະດຽວກັນປີ 2015 ໄດ້ເພີ່ມຂຶ້ນ 2,6%.