ວັນທີ 27 ມັງກອນນີ້, ດຣ. ຄຼາວສ໌ ສະວາບ ຜູ້ປະດິດສ້າງ ທັງເປັນປະທານປະຕິບັດງານເວທີເສດຖະກິດໂລກໄດ້ຕີລາຄາສູງຕໍ່ຄຳປາໄສຂອງທ່ານສີຈີ້ນຜີງ ໃນພິທີໄຂກອງປະຊຸມປະຈຳປີຂອງເວທີເສດຖະກິດໂລກ 2017 ແລະ ອວຍພອນປີໃໝ່ຕໍ່ປະຊາຊົນຈີນ.
ໃນເວລາໃຫ້ສຳພາດຕໍ່ນັກຂ່າວ, ດຣ.ສະວາບກ່າວວ່າ, ນັບແຕ່ຈີນດຳເນີນການປະຕິຮູບ ແລະ ເປີດປະຕູສູ່ພາຍນອກເປັນເວລາ 30 ກວ່າປີມານີ້, ບໍ່ພຽງແຕ່ເຮັດໃຫ້ປະຊາກອນ 700 ລ້ານກວ່າຄົນຫຼຸດພົ້ນອອກຈາກຄວາມທຸກຍາກ, ຍັງໄດ້ຊຸກຍູ້ເສດຖະກິດຂອງປະເທດອື່ນໆໃຫ້ເຕີບໂຕ ແລະ ພັດທະນາ. ດຣ.ສະວາບກ່າວຕື່ມວ່າ, ໂດຍປິ່ນອ້ອມຫົວຂໍ້ ແລະ ຈຸດປະສົງຂອງກອງປະຊຸມປະຈຳປີຂອງເວທີເສດຖະກິດໂລກ, ທ່ານສີຈີ້ນຜີງໄດ້ສະເໜີວິທີແກ້ໄຂບັນຫາໃນປັດຈຸບັນ, ມີຈຸດຢືນທີ່ຍຶດໝັ້ນປະຕິບັດງານຮ່ວມກັນໃນການຮ່ວມມືສາກົນ ເພື່ອສ້າງຮູບການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ. ມີແຕ່ເຮັດແນວນີ້, ຈິ່ງສາມາດຊອກຫາວິທີແກ້ໄຂບັນຫາຕ່າງໆ ເຊັ່ນ, ການເຕີບໂຕຂອງເສດຖະກິດໂລກທີ່ຄ່ອຍໆເສຍຄວາມດຸນດ່ຽງ, ດິນຟ້າອາກາດປ່ຽນແປງ ແລະ ລັດທິກໍ່ການຮ້າຍເປັນຕົ້ນ.
ດຣ.ສະວາບຍັງອວຍພອນປີໃໝ່ຕໍ່ປະຊາຊົນຈີນ ແລະ ອວຍພອນໃຫ້ຈີນຈະເລີນຮຸ່ງເຮືອງ, ປະຊາຊົນມີຄວາມສຸກໃນປີໃໝ່ທີ່ວຽນມາເຖິງນີ້.
