ວັນທີ 28 ມັງກອນນີ້ ເປັນບຸນກຸດຈີນທີ່ກົງກັບມື້ຂຶ້ນ 1 ຄ່ຳເດືອນຈຽງ ຕາມຈັນທະຄະຕິຈີນ ເຊິ່ງຄະນະສິລະປະ"ວັດທະນະທຳຈີນ,ທົ່ວໂລກຮ່ວມສະຫຼອງກຸດຈີນ2017"ເອີຣົບ 2 ໄດ້ອອກເດີນທາງໄປອັງກິດ,ໂຮນລັງແລະແອັສປາຍເພື່ອດຳເນີນການສະແດງໃຫ້ຊາວຈີນຕ່າງດ້າວເປັນເວລາ 18 ວັນ. ໃນຖານະເປັນຄະນະສິລະປະທຳອິດທີ່ອອກເດີນທາງໃນປີລະກາ, ຄະນະສິລະປະເອີຣົບ 2 ໄດ້ສະແດງຢູ່ນະຄອນຫຼວງລອນດອນປະເທດອັງກິດໃນວັນທີ 29 ມັງກອນນີ້, ຈາກນັ້ນຈະເດີນທາງໄປເມືອງເບີມິງແຮມປະເທດອັງກິດ,ໂຮນລັງ, ເມືອງບາເຊໂລນາ(Barcelona)ແລະນະຄອນຫຼວງມາດຣິດປະເທດແອັສປາຍ ແລະແຫ່ງອື່ນໆໂດຍຈະສະແດງ 7 ຮອບຢູ່ 3 ປະເທດດັ່ງກ່າວ.
ທ່ານຈ່າງຢົງເວິນ ຫົວໜ້າຄະນະສິລະປະ, ຫົວໜ້າກົມບໍລິຫານເລຂາທິການຫ້ອງການວຽກງານຊາວຈີນຕ່າງດ້າວລັດຖະບານຈີນຢືນຢັນວ່າ ການສະແດງຢູ່ສະໜາມຫຼວງເປັນຈຸດສຸມໃຫຍ່ອັນໜຶ່ງຂອງຄະນະສິລະປະເອີຣົບ 2 ເຊິ່ງການສະແດງ 7 ຮອບທີ່ກຳນົດໄວ້ໃນແຜນການນັ້ນມີ 3 ຮອບສະແດງຢູ່ສະໜາມຫຼວງ.
ກິດຈະກຳ "ວັດທະນະທຳຈີນ,ທົ່ວໂລກຮ່ວມສະຫຼອງບຸນກຸດຈີນ"ເປັນກິດຈະກຳວັດທະນະທຳທີ່ຫ້ອງການວຽກງານຊາວຈີນຕ່າງດ້າວລັດຖະບານຈີນແລະສະມາຄົມແລກປ່ຽນຕໍ່ຕ່າງປະເທດຈີນເປັນຜູ້ຈັດຕັ້ງຂຶ້ນ ແລະນັບແຕ່ປີ 2009 ເປັນຕົ້ນມາໄດ້ຈັດຂຶ້ນຢ່າງສຳເລັດຜົນ ມາແລ້ວ 9 ຄັ້ງໂດຍມີຊື່ວ່າ "ງານລາຕີສະໂມສອນບຸນກຸດຈີນຢູ່ຕ່າງປະເທດ"
 |
