ວັນທີ 28 ມັງກອນນີ້, ທ່ານວຼາດີເມຍ ປູຕິນ ປະທານາທິບໍດີຣັດເຊຍແລະທ່ານໂດນັນ ທຣຳ ປະທານາທິບໍດີອາເມລິກາໄດ້ລົມກັນໂດຍຜ່ານໂທລະສັບ, ສອງຝ່າຍຕົກລົງຈະສຸມກຳລັງເພື່ອບັນລຸໃຫ້ສາຍພົວພັນລະຫວ່າງສອງປະເທດຂະຫຍາຍຕົວຢ່າງໝັ້ນທ່ຽງ, ຮ່ວມມືແກ້ໄຂບັນຫາສາກົນທີ່ສຳຄັນ.
ຂ່າວແຈ້ງວ່າ, ປະທານາທິບໍດີສອງປະເທດໄດ້ປຶກສາຫາລືບັນຫາສາກົນເຊັ່ນການຕໍ່ຕ້ານລັດທິກໍ່ການຮ້າຍ, ສະຖານະການເຂດຕາເວັນອອກກາງ, ການປະທະກັນລະຫວ່າງປະເທດອາລັບກັບອິສຣາແອນ, ບັນຫານິວເຄຼຍອີຣານ, ບັນຫາແຫຼມເກົາຫຼີ, ວິກິດການອູແກຣນແລະອື່ນໆ. ສອງຝ່າຍຕົກລົງຈະດຳເນີນການຮ່ວມມືແບບຄູ່ຮ່ວມມືເພື່ອແກ້ໄຂບັນຫາດັ່ງກ່າວ, ສຸມກຳລັງເພື່ອຕໍ່ຕ້ານລັດທິກໍ່ການຮ້າຍສາກົນເປັນບູລິມະສິດ, ປະສານສົມທົບການເຄື່ອນໄຫວເພື່ອດັບສູນກຸ່ມ IS ແລະອົງການກໍ່ການຮ້າຍອື່ນໆຢູ່ດິນແດນຊີຣີ.
ຂ່າວແຈ້ງອີກວ່າ, ປະທານາທິບໍດີສອງປະເທດໄດ້ກ່າວເນັ້ນຄວາມສຳຄັນທີ່ຟື້ນຟູການໄປມາຫາສູ່ກັນດ້ານເສດຖະກິດການຄ້າລະຫວ່າງສອງປະເທດ, ເຫັນວ່ານີ້ຈະຊຸກຍູ້ໃຫ້ສາຍພົວພັນລະຫວ່າງຮັດເຊຍກັບອາເມລິກາຂະຫຍາຍຕົວຢ່າງໝັ້ນທ່ຽງ. ທ່ານປູຕິນແລະທ່ານທຣຳຍັງຕົກລົງວ່າຈະໃຫ້ພາກສ່ວນທີ່ກ່ຽວຂ້ອງຂອງສອງປະເທດປຶກສາຫາລືເວລາແລະສະຖານທີ່ພົບປະກັນເປັນເທື່ອທຳອິດ, ປະທານາທິບໍດີສອງປະເທດຈະມີການຕິດຕໍ່ພົວພັນເປັນປະຈຳ.
 |
