ຕອນຄ່ຳວັນທີ 29 ມັງກອນນີ້, ຜູ້ຮັບຜິດຊອບກົມປະຕິບັດກົດໝາຍທາງທະເລມາເລເຊຍກ່າວວ່າ, ໃນເຫດການເຮືອບັນທຸກນັກທ່ອງທ່ຽວຫຼົ້ມຢູ່ເຂດທະເລໃກ້ເກາະເມັນກາລົມປະເທດຕົນນັ້ນ, ມີ 22 ຄົນໄດ້ຮັບການຊ່ວຍເຫຼືອ, ມີນັກທ່ອງທ່ຽວຈີນ 6 ຄົນຫາຍສາບສູນ, 3 ຄົນເສຍຊີວິດອີກ, ປັດຈຸບັນວຽກງານກູ້ໄພຍັງເລັ່ງດຳເນີນຢູ່.
ສື່ມວນຊົນມາເລເຊຍລາຍງານວ່າ, ໃນເຮືອລຳດັ່ງກ່າວມີນັກທ່ອງທ່ຽວຈີນ 28 ຄົນແລະລູກເຮືອ 3 ຄົນ, ເຮືອລຳນີ້ຫຼົ້ມຢູ່ເຂດທະເລໃກ້ເກາະເມັນກາລົມ, ລູກເຮືອ 2 ຄົນພະຍາຍາມຂຶ້ນບົກໄດ້ແລະຮຽກການຊ່ວຍເຫຼືອ, ຂະນະທີ່ນັກທ່ອງທ່ຽວຫຼາຍຄົນໄດ້ຊ່ວຍເຫຼືອກັນຟູຢູ່ໜ້ານ້ຳພາຍໃຕ້ການຊ່ວຍເຫຼືອຂອງລູກເຮືອອີກຄົນໜຶ່ງແລະລໍຖ້າການຊ່ວຍເຫຼືອ.
ນອກນີ້ຂ່າວແຈ້ງວ່າ, ເຮືອລຳໜຶ່ງທີ່ບັນຈຸນັກທ່ອງທ່ຽວຈີນທີ່ໄດ້ຮັບການຊ່ວຍເຫຼືອນັ້ນໄດ້ເດີນທາງເຖິງໂຄຕາຄີນາບາລູ, ເທດສະບານລັດຊາບາໃນຕອນຂ້ອນແຈ້ງວັນທີ 30 ມັງກອນນີ້. ໃນເວລາໃຫ້ສຳພາດຕໍ່ນັກຂ່າວ, ທ່ານນາງເສິນເພີ້ຍແຈ ກົງສຸນໃຫຍ່ຂອງສະຖານກົງສຸນຈີນປະຈຳໂຄຕາຄີນາບາລູກ່າວວ່າ, ນັກທ່ອງທ່ຽວຈີນທີ່ໄດ້ຮັບການຊ່ວຍເຫຼືອນັ້ນລ້ວນແຕ່ໄດ້ຮັບບາດເຈັບໃນລະດັບໃດໜຶ່ງຕ່າງກັນ, ແລະໄດ້ສົ່ງໄປປິ່ນປົວຢູ່ໂຮງໝໍແລ້ວ.