ຕາມຂ່າວCRI: ວັນທີ 31 ມັງກອນນີ້, ທ່ານສີຈີ້ນຜີງ ປະທານປະເທດຈີນ ກັບ ທ່ານນາງມາຣີ ລູອີສ ກາເລໂຣ ເບຼກາ ປະທານາທິບໍດີມານຕາໄດ້ສົ່ງ ໂທລະເລກເຊິ່ງກັນແລະກັນ ເນື່ອງໃນໂອກາດທີ່ສອງປະເທດສ້າງສາຍພົວພັນທາງການທູດຄົບຮອບ 45 ປີ.
ໃນໂທລະເລກ, ທ່ານສີຈີ້ນຜີງຊີ້ອອກວ່າ, ນັບແຕ່ຈີນ ກັບ ມານຕາສ້າງສາຍພົວພັນທາງການທູດເປັນເວລາ 45 ປີມານີ້, ການພົວພັນມິດຕະພາບລະຫວ່າງສອງປະເທດໄດ້ຂະຫຍາຍຕົວຢ່າງຕໍ່ເນື່ອງ, ຄວາມໄວ້ເນື້ອເຊື່ອໃຈທາງການເມືອງໄດ້ລົງເລິກຢ່າງບໍ່ຢຸດຢັ້ງ, ການແລກປ່ຽນ ແລະ ການຮ່ວມມືໃນຂົງເຂດຕ່າງໆໄດ້ຮັບໝາກຜົນຢ່າງສົມບູນ.ທ່ານເອົາໃຈໃສ່ນຳການຂະຫຍາຍການພົວພັນຈີນ-ມານຕາໃນລະດັບສູງ, ຍິນດີຮ່ວມ ກັບທ່ານນາງປະທານາທິບໍດີເບຼກາ, ຊຸກຍູ້ມິດຕະພາບອັນເປັນມູນເຊື້ອ ແລະ ການຮ່ວມມືທີ່ຕິດແທດຕົວຈິງລະຫວ່າງສອງປະເທດລົງເລິກຢ່າງບໍ່ຢຸດຢັ້ງ, ເພື່ອສ້າງຄວາມຜາສຸກໃຫ້ແກ່ສອງປະເທດ ແລະ ປະຊາຊົນສອງຊາດຍິ່ງໆຂຶ້ນ.
ໃນໂທລະເລກ, ທ່ານນາງເບຼກາກ່າວວ່າ, ນັບແຕ່ມານຕາ ກັບ ຈີນສ້າງສາຍພົວພັນທາງການທູດເປັນເວລາ 45 ປີມານີ້, ການພົວພັນພິເສດລະຫວ່າງສອງປະເທດໄດ້ຂະຫຍາຍຕົວຢ່າງດີງາມບົນພື້ນຖານທີ່ເຄົາລົບ ແລະ ເຂົ້າໃຈເຊິ່ງກັນແລະກັນ. ໂດຍປະເຊີນໜ້າກັບສິ່ງທ້າທາຍ ແລະ ທີ່ສະຖານະການສາກົນທີ່ປ່ຽນແປງ, ການຮ່ວມມືລະຫວ່າງສອງປະເທດນັບມື້ນັບແໜ້ນແຟ້ນຂຶ້ນ. ມຸ່ງໜ້າໄປສູ່ອະນາຄົດ, ການພົວພັນມານຕາ-ຈີນຈະໄດ້ຮັບການເພິ່ມພູນຄູນສ້າງຢ່າງບໍ່ຢຸດຢັ້ງ.