ຜູ້ລາຍງານພິເສດບັນຫາສິດທິມະນຸດອົງການສະຫະປະຊາຊາດໃນດ້ານຊາວອົບພະຍົບ,ການຕ້ານລັດທິກໍ່ການຮ້າຍ,ການຕ້ານການທໍລະມານ ແລະເສລີພາບທາງສາສະໜາລວມ 4 ທ່ານໄດ້ອອກຖະແຫຼງການຮ່ວມໃນວັນທີ 1 ກຸມພານີ້ໂດຍຕຳໜິອາເມລິກາທີ່ປະກາດຄຳສັ່ງຫ້າມເຂົ້າປະເທດສະບັບຫຼ້າສຸດ ທັງເຫັນວ່າ ຄຳສັ່ງດັ່ງກ່າວສົງໄສວ່າເປັນການຈຳແນກດູໝິ່ນເຊື້ອຊາດຜິວໜັງ, ສັນຊາດແລະສາສະໜາ ເຊິ່ງຝ່າຝືນກັບພັນທະສາກົນທີ່ອາເມລິກາຄວນປະຕິບັດ.
ຖະແຫຼງການລະບຸວ່າ: ມັນຊັດເຈນແລ້ວວ່າ, ຜົນຈາກການປະກາດຄຳສັ່ງຫ້າມເຂົ້າປະເທດອາເມລິກາຄືເຮັດໃຫ້ປະເທດອິສລາມມີຊື່ສຽງໃນທາງລົບຫຼາຍຂຶ້ນ ເຊິ່ງເປັນການລະເມີດມະນຸດສະທຳສາກົນແລະກົດໝາຍວ່າດ້ວຍສິດທິມະນຸດໂດຍກົງ.
ຖະແຫຼງການລະບຸວ່າ: ອາເມລິກາເຂົ້າກ່ຽວໂດຍກົງກັບການປະທະກັນຢູ່ອີຣັກແລະຊີຣີ, ໃນກໍລະນີນີ້, ອາເມລິກາຍິ່ງຄວນຮັບຜິດຊອບຕໍ່ຜູ້ອົບພະຍົບທີ່ກຳເນີດມາຈາກການປະທະກັນເຫຼົ່ານີ້, ໃຫ້ການປົກປ້ອງແລະຄວາມຊ່ວຍເຫຼືອແກ່ຜູ້ຄົນທີ່ລີໄພຈາກການປະທະກັນແລະຕົກຢູ່ໃນສະພາບອັດຕະຄັດ.