ວັນທີ 1 ກຸມພານີ້, ສຳນັກງານຄັງສຳຮອງເຊິ່ງເປັນທະນາຄານກາງຂອງອາເມລິກາຫຼື FED ປະກາດວ່າຮັກສາອັດຕາດອກເບັ້ຍຢູ່ລະຫວ່າງ 0.5-0.75% ບໍ່ປ່ຽນແປງ, ສອດຄ່ອງກັບການຄາດໝາຍທົ່ວໄປຂອງຕະຫຼາດ.
ພາຍຫຼັງກອງປະຊຸມປະຈຳນະໂຍບາຍເງິນຕາປະຈຳປີຄັ້ງທຳອິດສິ້ນສຸດລົງໃນວັນທີ 1 ກຸມພານີ້, FED ໄດ້ອອກຖະແຫຼງການວ່າ, ນັບແຕ່ທ້າຍເດືອນທັນວາປີຜ່ານມາມານີ້, ຕະຫຼາດແຮງງານໄດ້ປັບປຸງດີຂຶ້ນຢ່າງຕໍ່ເນື່ອງ, ເສດຖະກິດໄດ້ສືບຕໍ່ຄ່ອຍໆເຕີບໂຕ, ຄວາມໝັ້ນໃຈຂອງຜູ້ບໍລິໂພກແລະວິສາຫະກິດໄດ້ດີຂຶ້ນຢ່າງຈະແຈ້ງ, ອັດຕາເງິນເຟີ້ກໍສູງຂຶ້ນເລັກໜ້ອຍ, ແຕ່ຍັງຕ່ຳກວ່າເປົ້າໝາຍ 2% ຂອງ FED, ການລົງທຶນດ້ານຊັບສິນຄົງທີ່ຂອງວິສາຫະກິດຍັງອ່ອນແອສົມຄວນ.
ໃນຖະແຫຼງການດັ່ງກ່າວ, FED ບໍ່ໄດ້ແຈ້ງເວລາທີ່ຈະເພີ່ມອັດຕາດອກເບັ້ຍຄັ້ງຕໍ່ໄປ. FED ໄດ້ເພີ່ມອັດຕາດອກເບັ້ຍ 0,25% ໃນກອງປະຊຸມນະໂຍບາຍເງິນຕາທີ່ຈັດຂຶ້ນໃນເດືອນທັນວາປີຜ່ານມາ, ແລະຄາດວ່າປີນີ້ຈະເພີ່ມອັດຕາດອກເບັ້ຍ 3 ເທື່ອ. ແຕ່ວ່າ, ເຈົ້າໜ້າທີ່ຂອງ FED ສ່ວນຫຼາຍເຫັນວ່ານະໂຍບາຍການເງິນແລະນະໂຍບາຍເສດຖະກິດອື່ນໆຂອງທ່ານໂດນັນ ທຣຳ ປະທານາທິບໍດີອາເມລິກາບໍ່ແນ່ນອນຈະກະທົບເຖິງຈັງຫວະເພີ່ມອັດຕາດອກເບັ້ຍຂອງ FED.
 |
