ທ່ານເຜິງຢີ້ໝິນ ຜູ້ຊ່ວຍຫົວໜ້າພະແນກທ່ອງທ່ຽວ, ວັດທະນະທຳ ແລະ ສິ່ງແວດລ້ອມລັດຊາບາ ປະເທດມາເລເຊຍ ໄດ້ໃຫ້ສຳພາດຕໍ່ນັກຂ່າວໃນວັນທີ 3 ກຸມພານີ້ວ່າ: ອຳນາດການປົກຄອງລັດຕົນໄດ້ສ້າງຕັ້ງຄະນະກຳມະການສືບສວນປະສົມຫຼາຍຂະແໜງຂຶ້ນ ເພື່ອຮັບຜິດຊອບຫາສາເຫດທີ່ພາໃຫ້ເກີດເຫດການເຮືອຫຼົ້ມຢ່າງເຖິງຖອງ ແລະ ຈະໃຊ້ມາດຕະການປັບປຸງຕະຫຼາດທ່ອງທ່ຽວໃຫ້ເປັນຜົນ ເພື່ອຮັບປະກັນຄວາມປອດໄພໃຫ້ແກ່ນັກທ່ອງທ່ຽວປະເທດຕ່າງໆ ລວມທັງນັກທ່ອງທ່ຽວຊາວຈີນ.
ທ່ານ ເຜິງຢີ້ໝິນ ກ່າວວ່າ: ຫຼັງເກີດເຫດການເຮືອຫຼົ້ມ, ອຳນາດການປົກຄອງລັດຊາບາກໍໄດ້ປະຕິບັດກົນໄກຮັບມືສຸກເສີນທັນທີ ໂດຍການປະສານພົວພັນກັບສະຖານທູດຈີນປະຈຳປະເທດຕົນ ແລະ ສະຖານກົງສຸນໃຫຍ່ຈີນປະຈຳໂກຕາກີນາບາລູ ຢ່າງໃກ້ຊິດ ທັງໄດ້ສຸມທຸກຄວາມພະຍາຍາມເພື່ອຄົ້ນຫາຜູ້ຫາຍສາບສູນ. ອີກດ້ານໜຶ່ງກໍຂຸ້ນຂ້ຽວປິ່ນປົວແລະປອບໃຈນັກທ່ອງທ່ຽວຈີນທີ່ໄດ້ຮັບການຊ່ວຍເຫຼືອແລ້ວນັ້ນເປັນຢ່າງດີ. ຂະນະທີ່ໃນຕໍ່ໜ້າ ນອກຈາກຈະສືບຕໍ່ຄົ້ນຫາຜູ້ຫາຍສາບສູນ ແລະ ປິ່ນປົວນັກທ່ອງທ່ຽວທີ່ໄດ້ຮັບການຊ່ວຍເຫຼືອນັ້ນແລ້ວ, ປະເທດຕົນຍັງຈະພ້ອມກັບສະຖານທູດແລະສະຖານກົງສຸນຈີນປະຈຳປະເທດຕົນເພື່ອຈັດສັນຄອບຄົວຂອງນັກທ່ອງທ່ຽວທີ່ເດີນທາງເຖິງມາເລເຊຍ ແລະ ດຳເນີນການໄຊ້ແທນ ທັງຍັງຈະປັບປຸງຕະຫຼາດທ່ອງທ່ຽວຂອງປະເທດຕົນໃຫ້ດີຂຶ້ນ.
ທ່ານເຜິງຢີ້ໝິນ ກ່າວຕື່ມວ່າ: ໃນອາທິດໜ້າຈະເປີດເຜີຍບົດລາຍງານການສືບສວນເບື້ອງຕົ້ນ ແລະ ຈາກນີ້ກໍຈະສະເໜີຍັດຕິກ່ຽວກັບການປັບປຸງຂະແໜງການທ່ອງທ່ຽວປະເທດຕົນ.
ທັງນີ້, ເຮືອທ່ອງທ່ຽວທີ່ບັນທຸກນັກທ່ອງທ່ຽວຈີນ 20 ກວ່າຄົນລຳໜຶ່ງໄດ້ຫຼົ້ມຢູ່ເຂດທະເລໃກ້ລັດຊາບາ ປະເທດມາເລເຊຍໃນວັນທີ 28 ມັງກອນຜ່ານມາ ຈາກເຫດດັ່ງກ່າວໄດ້ນັກທ່ອງທ່ຽວ 3 ຄົນເສຍຊີວິດ, ແຕ່ກໍມີຈຳນວນໜຶ່ງໄດ້ຮັບການຊ່ວຍເຫຼືອ. ຂະນະທີ່ເຈົ້າໜ້າທີ່ຕຳຫຼວດມາເລເຊຍ ກໍຢືນຢັນວ່າ: ປັດຈຸບັນຍັງມີນັກທ່ອງທ່ຽວ 5 ຄົນ ແລະ ລູກເຮືອ 1 ຄົນຍັງຫາຍສາບສູນ.