ເມື່ອມໍ່ໆນີ້, ບໍລິສັດອັງກິດໄດ້ເຜີຍແຜ່ບົດລາຍງານກ່ຽວກັບທ່າຂະຫຍາຍຕົວຂອງອິນເຕີເນັດວ່າ: ອີງຕາມຕົວເລກຜູ້ຊົມໃຊ້ແຕ່ລະເດືອນຂອງບໍລິສັດສື່ສັງຄົມອອນລາຍໃນເດືອນມັງກອນຜ່ານມາ ປາກົດວ່າ, ຊາວຟິລິບປິນຊົມໃຊ້ສື່ສັງຄົມອອນລາຍເຟັສບຸກ ແລະ ທວິດເຕີ ສະເລ່ຍ 4 ຊົ່ວໂມງ 17 ນາທີຕໍ່ມື້ ແລະກາຍເປັນທີໜຶ່ງຂອງໂລກ.
ບົດລາຍງານຍັງລະບຸວ່າ: ຖັດຈາກຟິລິບປິນແມ່ນເບຣຊິນ ແລະ ອັກຊັງຕິນ, ຂະນະທີ່ອາເມລິກາທີ່ເປັນປະເທດມີບໍລິສັດສື່ສັງຄົມອອນລາຍຫຼາຍນັ້ນ, ປະຊາຊົນຊົມໃຊ້ສື່ສັງຄົມອອນລາຍສະເລ່ຍມີພຽງແຕ່ 2 ຊົ່ວໂມງ 6 ນາທີຕໍ່ມື້ເທົ່ານັ້ນ, ສ່ວນຄົນຍີ່ປຸ່ນຊົມໃຊ້ໜ້ອຍທີ່ສຸດ ໂດຍສະເລ່ຍພຽງແຕ່ 40 ນາທີຕໍ່ມື້ເທົ່ານັ້ນ, ສ່ວນຄົນຈີນໃຊ້ເວລາສະເລ່ຍ 1 ຊົ່ວໂມງ 50 ນາທີຕໍ່ມື້.
ທັງນີ້, ຟິລິບປິນແມ່ນໜຶ່ງໃນປະເທດທີ່ມີຜູ້ຊົມໃຊ້ສື່ສັງຄົມອອນລາຍໂລກເພີ່ມຂຶ້ນອ່າວໄວ ໂດຍເດືອນມັງກອນຜ່ານມາ, ຜູ້ຊົມໃຊ້ສື່ສັງຄົມອອນລາຍຂອງໂລກໄດ້ເພີ່ມຂຶ້ນ 21%, ຂະນະທີ່ຟິລິບປິນໄດ້ເພີ່ມຂຶ້ນ 25% ເປັນທີ 8 ໃນໂລກ. ນອກນີ້, ປະເທດໃນອາຊຽນລ້ວນແຕ່ໄດ້ເພີ່ມຂຶ້ນຢ່າງຈະແຈ້ງ ໂດຍເຄິ່ງໜຶ່ງຢູ່ໃນອັນດັບແຕ່ທີ 1 ຫາທີ 10.
