ວັນທີ 3 ກຸມພານີ້, ຜູ້ນຳ 28 ປະເທດໃນສະຫະພາບເອີລົບທີ່ເຂົ້າຮ່ວມກອງປະຊຸມສຸດຍອດບໍ່ເປັນທາງການຢູ່ວາເລຕາ ນະຄອນຫຼວງປະເທດມານຕາໄດ້ອອກຖະແຫຼງການມານຕາ. ໂດຍຢໍ້າວ່າສະຫະພາບເອີລົບເນັ້ນໜັກການປົກປັກຮັກສາຊາຍແດນທາງນອກ ເພື່ອສະກັດກັ້ນຄົນເຂົ້າເມືອງທີ່ຜິດກົດໝາຍ, ທັງໄດ້ປະກາດ 10 ບຸລິມະສິດທີ່ເພີ່ມທະວີການຮ່ວມມືກັບປະເທດອາຟຼິກາເໜືອຄືລີບີເປັນຕົ້ນ ເພື່ອສະກັດກັ້ນຄົນເຂົ້າເມືອງທີ່ຜິດກົດໝາຍຕາມເສັ້ນທາງພາກກາງຂອງທະເລເມດິແຕຣາເນ.
ຖະແຫຼງການຊີ້ອອກວ່າ, ລີບີກາຍເປັນປະເທດຕົ້ນຕໍຂອງຄົນທີ່ເຂົ້າສະຫະພາບເອີລົບຢ່າງຜິດກົດໝາຍ, ເຊິ່ງຈຸດນີ້ສະຫະພາບເອີລົບຈະເພີ່ມທະວີການຮ່ວມມືກັບປະເທດອາຟຼິກາເໜືອຄືລີບີເປັນຕົ້ນແລະປະເທດໃກ້ຄຽງທີ່ຢູ່ທິດໃຕ້ຂອງທະເລຊາຍຊາຮາຣາ.
ພາຍຫຼັງສະຫະພາບເອີລົບແລະຕວກກີບັນລຸສັນຍາກ່ຽວກັບບັນຫາຊາວອົບພະຍົບໃນເດືອນມີນາປີຜ່ານມາ, ຈຳນວນຊາວອົບພະຍົບໃນພາກຕາເວັນອອກກາງທີ່ຮອດເອີລົບຈາກທະເລເອຈິນຫຼຸດລົງ. ແຕ່ວ່າ, ຈຳນວນຊາວອົບພະຍົບອາຟຼິກາເໜືອທີ່ຕ້ອງການເຂົ້າເອີລົບຈາກພາກກາງຂອງທະເລເມດິເທີແຕຣາເນພັດຫຼາຍຂຶ້ນ.