ເຈົ້າໜ້າທີ່ກະຊວງຄົມມະນາຄົມຂົນສົ່ງຈີນແຈ້ງໃຫ້ຊາບໃນວັນທີ 3 ກຸມພານີ້ວ່າ, ໃນໄລຍະມື້ພັກບຸນກຸດຈີນຄືແຕ່ວັນທີ 27 ມັງກອນຜ່ານມາເຖິງວັນທີ 2 ກຸມພານີ້, ຂະແໜງຂອງຕົນໃນທົ່ວປະເທດໄດ້ບໍລິການຜູ້ໂດຍສານ 408 ລ້ານເທື່ອຄົນ ເຊິ່ງເພີ່ມຂຶ້ນ 2,1% ເມື່ອທຽບໃສ່ໄລຍະດຽວກັນຂອງປີຜ່ານມາ.
ເຈົ້າໜ້າທີ່ກະຊວງດັ່ງກ່າວເປີດເຜີຍວ່າ: ໃນໄລຍະບຸນກຸດຈີນ, ມີລົດທີ່ແລ່ນຜ່ານເສັ້ນທາງທີ່ເສຍຄ່າທາງໃນທົ່ວປະເທດ ເຖິງ 240 ລ້ານ 1 ແສນ 6 ໝື່ນ 3 ພັນຄັນ ເຊິ່ງເພີ່ມຂຶ້ນ 12,75% ເມື່ອທຽບໃສ່ໄລຍະດຽວກັນຂອງປີຜ່ານມາ, ທັງນີ້ ກະຊວງຂອງຕົນກໍໄດ້ຍົກເວັ້ນການເກັບເງິນຄ່າຜ່ານເສັ້ນທາງທີ່ມີມູນຄ່າເຖິງ 8 ຕື້ 702 ລ້ານຢວນ ເຊິ່ງເພີ່ມຂຶ້ນ 17,4%. ສຳລັບຮູບແບບການເດີນທາງນັ້ນກໍເຫັນວ່າ, ມີ 336 ລ້ານເທື່ອຄົນເດີນທາງດ້ວຍທາງຫຼວງ, ເພີ່ມຂຶ້ນ 0,8%; ດ້ວຍທາງລົດໄຟ 51 ລ້ານ 9 ແສນ 9 ໝື່ນເທື່ອຄົນ ເພີ່ມຂຶ້ນ 8,8%; ດ້ວຍການບິນພົນລະເຮືອນ 9 ລ້ານ 8 ແສນ 2 ໝື່ນເທື່ອຄົນ ເພີ່ມຂຶ້ນ 14,9% ແລະດ້ວຍເຮືອ 10 ລ້ານ 3 ແສນ 5 ໝື່ນເທື່ອຄົນ ເພີ່ມຂຶ້ນ 3,5%.
ຂໍ້ມູນສະແດງໃຫ້ເຫັນວ່າ, ໃນໄລຍະບຸນກຸດຈີນ, ຜູ້ໂດຍສານ ສະເລ່ຍໃຊ້ໄລຍະເດີນທາງ 262 ກິໂລແມັດ. ຂະນະດຽວກັນ ໄລຍະເດີນທາງກໍສັ້ນກວ່າຢ່າງຈະແຈ້ງ ໂດຍສັ້ນກວ່າ 500 ກິໂລແມັດເຊິ່ງກວມປະມານ 87,8% ແລະສ່ວນຫຼາຍກໍເລືອກເດີນທາງພາຍໃນແຂວງຕົນ ເຊິ່ງກວມປະມານ 65,5%. ຈາກນີ້ຈຶ່ງເຫັນວ່າ, ເປົ້າໝາຍຂອງຜູ້ທີ່ໄປຢ້ຽມຢາມຍາດຕິພີ່ນ້ອງໄດ້ກວມເຖິງ 78%, ຂະນະທີ່ຜູ້ໄປທ່ອງທ່ຽວກວມພຽງແຕ່ 14% ເທົ່ານັ້ນ.