ຫວ່າງມໍ່ໆມານີ້, ອົງການກອງທຶນເງິນຕາສາກົນ ຫຼື IMF ໄດ້ເຜີຍແຜ່ບົດລາຍງານໂດຍສະແດງໃຫ້ເຫັນວ່າ,ປີ2016ຈັງຫວະການເຕີບໂຕຂອງເສດຖະກິດອິນໂດເນເຊຍໄດ້ເພີ່ມຈາກ4,8%ໃນປີ2015 ຂຶ້ນເປັນ 5%, ເຊິ່ງເປັນລະດັບສູງສົມຄວນໃນກຸ່ມເສດຖະກິດຕ່າງໆທີ່ຈະເລີນໃໝ່.
ບົດລາຍງານດັ່ງກ່າວລະບຸວ່າ, ເສດຖະກິດຂອງອິນໂດເນເຊຍເຕີບໂຕຢ່າງແຂງແຮງແລະຕໍ່ເນື່ອງນັ້ນໄດ້ຮັບຜົນປະໂຫຍດຈາກນະໂຍບາຍເສດຖະກິດທີ່ໝັ້ນທ່ຽງແລະການບໍລິໂພກໃນຄອບຄົວເພີ່ມຂຶ້ນ. ບົດລາຍງານຊີ້ອອກວ່າ,ຄຽງຄູ່ກັບຜູ້ບໍລິໂພກມີກຳລັງການຊື້ເພີ່ມຂຶ້ນ, ການບໍລິໂພກໃນຄອບຄົວໄດ້ກາຍເປັນແຮງຊຸກຍູ້ທີ່ສຳຄັນຕໍ່ການເຕີບໂຕຂອງເສດຖະກິດອິນໂດເນເຊຍ; ເມື່ອສັງເກດທ່າອ່ຽງໄລຍະກາງແລ້ວ, ອິນໂດເນເນເຊຍຕ້ອງເພີ່ມການລົງທຶນເພື່ອເຮັດໃຫ້ເສດຖະກິດເຕີບໂຕຢ່າງຕໍ່ເນື່ອງແລະໄວຂຶ້ນ.
ນອກນີ້, ບົດລາຍງານຍັງຊີ້ອອກວ່າ, ລັດຖະບານອິນໂດເນເຊຍໄດ້ປະຕິບັດມາດຕະການປະຕິຮູບເພື່ອປັບປຸງສະພາບແວດລ້ອມການລົງທຶນແລະຊຸກຍູ້ການເຕີບໂຕຂອງເສດຖະກິດ. ເຊິ່ງມາດຕະການເຫຼົ່ານີ້ລວມທັງເພີ່ມການລົງທຶນເຂົ້າໃນການກໍ່ສ້າງພື້ນຖານໂຄງລ່າງ, ຫຼຸດຜ່ອນການຈຳກັດຈາກລັດຖະບານ, ເປີດກວ້າງຂົງເຂດເສດຖະກິດຕໍ່ການລົງທຶນພາກເອກະຊົນ ແລະອື່ນໆ.
ໂດຍມອງສູ່ອະນາຄົດ,ບົດລາຍງານດັ່ງກ່າວເຫັນວ່າ, ເສດຖະກິດອິນໂດເນເຊຍຍັງຈະປະເຊີນກັບສິ່ງທ້າທາຍຈາກປັດໄຈບໍ່ແນ່ນອນຕ່າງໆໃນໂລກ, ແຕ່ກໍຄາດຄະເນວ່າ,ປີ2017ຈັງຫວະເຕີບໂຕຂອງເສດຖະກິດອິນໂດເນເຊຍຈະເພີ່ມຂື້ນເປັນ5,1%,ແລະອັດຕາເງິນເຟີ້ຈະຈາກ3,2%ໃນທ້າຍປີ2016ຂຶ້ນເປັນ4,5%ໃນປີ2017.