ຫຼັງປະກາດສິ້ນສຸດການຢຸດຍິງແຕ່ຝ່າຍດຽວຕໍ່ພັກຄອມມູນິດຟິລິບປິນໜຶ່ງວັນ, ທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນປະກາດໃນວັນທີ 4 ກຸມພານີ້ວ່າ, ລັດຖະບານຈະຢຸດການເຈລະຈາສັນຕິພາບກັບພັກຄອມມູນິດຟິລິບປິນ.
ທັງນີ້, ທ່ານດູເຕີເຕໄດ້ກ່າວຕໍ່ສື່ມວນຊົນຢູ່ເມືອງດາວາວທາງພາກໃຕ້ຟິລິບປິນວ່າ, ຕົນຈະຊີ້ນຳໃຫ້ຜູ້ແທນລັດຖະບານຖອນອອກຈາກການເຈລະຈາສັນຕິພາບລະຫວ່າງລັດຖະບານປະເທດຕົນກັບແນວໂຮມປະຊາທິປະໄຕທົ່ວປະເທດທີ່ນຳພາໂດຍພັກຄອມມູນິດຟິລິບປິນທີ່ຕາມກຳນົດຈະຈັດຂຶ້ນຢູ່ໂຮນລັງໃນເດືອນກຸມພານີ້.
ຂະນະທີ່ພັກຄອມມູນິດຟິລິບປິນໄດ້ອອກຖະແຫຼງການໃນວັນທີ 1 ກຸມພານີ້ວ່າ, ເນື່ອງຈາກທ່ານດູເຕີເຕບໍ່ໄດ້ຕອບສະໜອງຄຳຮຽກຮ້ອງຂອງພັກຄອມມູນິດຟິລິບປິນທີ່ໃຫ້ປ່ອຍນັກໂທດການເມືອງຫຼາຍຮ້ອຍຄົນ, ພັກຄອມມູນິດຟິລິບປິນຈຶ່ງຕົກລົງຢຸດຕິການຢຸດຍິງແຕ່ຝ່າຍດຽວຕໍ່ລັດຖະບານນັບແຕ່ວັນທີ 10 ກຸມພາເປັນຕົ້ນໄປ.
ຂະນະດຽວກັນ, ທ່ານດູເຕີເຕກ່າວໃນວັນທີ 4 ກຸມພານີ້ວ່າ, ໃນບັນຫາການເຈລະຈາສັນຕິພາບກັບພັກຄອມມູນິດຟິລິບປິນ, ຕົນໄດ້ພະຍາຍາມຈົນສຸດຄວາມສາມາດແລ້ວ, ແຕ່ບໍ່ອາດສາມາດເຫັນດີນຳຄຳຮຽກຮ້ອງທີ່ໃຫ້ປ່ອຍສະມາຊິກພັກຄອມມູນິດຟິລິບປິນປະມານ 400 ຄົນນັ້ນໄດ້ ຈຶ່ງອອກຄຳສັ່ງໃຫ້ກອງທັບກະກຽມເປັນຢ່າງດີເພື່ອຕໍ່ສູ້ເປັນໄລຍະຍາວນານ.