ປະທານາທິບໍດີຊີຣີແກ່ຍາວເວລາຂອງຄຳສັ່ງນິລະໂທດກຳກຸ່ມປະກອບອາວຸດຕໍ່ຕ້ານລັດຖະບານທີ່ຍອມຈຳນົນ

ທ່ານບາຊາ ອາຊັດ ປະທານາທິບໍດີຊີຣີໄດ້ລົງນາມໃນຄຳສັ່ງໂດຍແກ່ຍາວເວລາຂອງຄຳສັ່ງນິລະໂທດກຳກຸ່ມປະກອບອາວຸດຕໍ່ຕ້ານລັດຖະບານທີ່ຍອມຈຳນົນໄປຈົນເຖິງວັນທີ 30 ມິຖຸນາປີນີ້.

ທ່ານບາຊາໄດ້ປະກາດຄຳສັ່ງນິລະໂທດກຳເມື່ອວັນທີ 28 ກໍລະກົດ 2016 ຜ່ານມາແລະມີຜົນບັງຄັບໃຊ້ 3 ເດືອນໂດຍເລັ່ງໃສ່ຜູ້ປະກອບອາວຸດຕໍ່ຕ້ານລັດຖະບານທີ່ວາງອາວຸດແລະປ່ອຍຕົວປະກັນດ້ວຍຄວາມປອດໄພຢ່າງບໍ່ມີເງື່ອນໄຂທັງຍອມຈຳນົນຕໍ່ລັດຖະບານ.ຕໍ່ມາ, ຄືວັນທີ 27 ຕຸລາປີດຽວກັນ, ທ່ານບາຊາກໍໄດ້ແກ່ຍາວເວລາຂອງຄຳສັ່ງດັ່ງກ່າວໄປອີກ 3 ເດືອນ.

ຫຼັງປະຕິບັດຄຳສັ່ງນິລະໂທດກຳເປັນຕົ້ນມາ, ກຸ່ມປະກອບອາວຸດຕໍ່ຕ້ານລັດຖະບານຢູ່ຫຼາຍທ້ອງຖິ່ນອ້ອມຂ້າງນະຄອນຫຼວງດາມັສແລະກອງທັບຊີຣີໄດ້ບັນລຸຄວາມປອງດອງ ເຊິ່ງໃນນີ້, ຜູ້ປະກອບອາວຸດຕໍ່ຕ້ານລັດຖະບານຈຳນວນໜຶ່ງໄດ້ຮັບການນິລະໂທດຫຼັງຍອມຈຳນົນ, ຜູ້ປະກອບອາວຸດອີກຈຳນວນໜຶ່ງທີ່ບໍ່ຍອມຈຳນົມໄດ້ຖອນກຳລັງກັບຄືນສູ່ ແຂວງອິດລິບ ທາງພາກຕາເວັນອອກປະເທດຊີຣີທີ່ຢູ່ໃຕ້ການຄວບຄຸມຂອງກຸ່ມປະກອບອາວຸດຕໍ່ຕ້ານລັດຖະບານແລະກຸ່ມຫົວຮຸນແຮງ.