ກອງໃຫຍ່ປ້ອງກັນຊາຍແດນກວາງຊີປະຈຳດ່ານມິດຕະພາບເຂດປົກຄອງຕົນເອງເຜົ່າຈ້ວງກວາງຊີ ສປ ຈີນເປີດເຜີຍໃນວັນທີ 5 ກຸ່ມພານີ້ວ່າ: ໄລຍະພັກບຸນກຸດຈີນປີນີ້, ມີຄົນອອກປະເທດຜ່ານດ່ານດັ່ງກ່າວເຖິງ 10.505 ເທື່ອຄົນ ໂດຍສ່ວນໃຫຍ່ເປັນນັກທ່ອງທ່ຽວໄປທ່ຽວຫວຽດນາມ. ທ່ານຫວງຊ້ານສຽງ ຫົວໜ້າເສນາທິການກອງໃຫຍ່ປ້ອງກັນຊາຍແດນກວາງຊີປະຈຳດ່ານມິດຕະພາບໃຫ້ຮູ້ວ່າ: ຈຳນວນຄົນອອກປະເທດຜ່ານດ່ານມິດຕະພາບໄດ້ເພີ່ມຂຶ້ນຫຼາຍກວ່າ 10% ເມື່ອທຽບໃສ່ໄລຍະດຽວກັນຂອງປີຜ່ານມາ.
ທ່ານຢາງຫຼິວເສິງ ຫົວໜ້າໜ່ວຍລົດໄຟລະຫວ່າງຊາດຍ່ານນານນິງຂອງພະແນກທາງລົດໄຟນານນິງ ເຂດປົກຄອງຕົນເອງເຜົ່າຈ້ວງກວາງຊີໃຫ້ຮູ້ວ່າ: ໄລຍະບຸນກຸດຈີນ,ຂະບວນລົດສາກົນT8701ແຕ່ນານນິງຫາໂຮ່ໂນ້ຍຫວຽດນາມມີຜູ້ໂດຍສານເຕັມເກືອບທຸກວັນ.
ຂະນະທີ່ເຈົ້າໜ້າທີ່ດ່ານພາສີຕຸ່ງຊິງ ເຂດປົກຄອງຕົນເອງເຜົ່າຈ້ວງກວາງຊີທີ່ເຊື່ອມຕໍ່ກັບດ່ານມອງກາຍຫວຽດນາມກໍເປີດເຜີຍວ່າ: ຕະຫຼອດໄລຍະພັກບຸນກຸດຈີນ, ຄະນະນັກທ່ອງທ່ຽວທີ່ຜ່ານດ່ານຕຸ່ງຊິງໄປທ່ຽວຫວຽດນາມມີເຖິງ 2160 ຄະນະ,ສະເລ່ຍ 308 ຄະນະຕໍ່ມື້ແລະນັກທ່ອງທ່ຽວ 34.394 ເທື່ອຄົນແລະຍອດຜູ້ຜ່ານດ່ານ ມີເຖິງ 109.006 ເທື່ອຄົນ ເພີ່ມຂຶ້ນ 28% ເມື່ອທຽບໃສ່ໄລຍະດຽວກັນຂອງປີຜ່ານມາ.