ຂ່າວສານອານາໂດລູຕວກກີລາຍງານໃນວັນທີ 5 ກຸມພານີ້ວ່າ, ເຈົ້າໜ້າທີ່ຕຳຫຼວດປະເທດຕົນໄດ້ປາບປາມກຸ່ມຫົວຮຸນແຮງ IS ຢູ່ຫຼາຍແຫ່ງໃນທົ່ວປະເທດ ແລະກໍສາມາດຈັບຜູ້ສົງໄສເປັນສາມາຊິກກຸ່ມຫົວຮຸນແຮງໄດ້ 60 ຄົນຢູ່ນະຄອນຫຼວງອັງກາຣາໃນຕອນເຊົ້າວັນດັ່ງກ່າວ ໃນນັ້ນສ່ວນຫຼາຍແມ່ນຄົນຕ່າງປະເທດ. ນອກນີ້, ເຈົ້າໜ້າທີ່ຕຳຫຼວດຍັງຈັບໄດ້ອີກ 30 ຄົນຢູ່ແຂວງໂກເນຍ ທາງພາກກາງ ແລະ ອີກ 10 ຄົນຢູ່ແຂວງມານາຊາ, ອິສຕານບຸນ, ຊຳຊຸນ ແລະແຂວງກາຊີອານເຕັບ.
ຂ່າວແຈ້ງອີກວ່າ, ກົມໃຫຍ່ເສນາທິການກອງທັບຕວກກີ ໄດ້ອອກຖະແຫຼງການໃນວັນທີ 5 ກຸມພານີ້ວ່າ: ກອງທັບຕວກກີໄດ້ເຄື່ອນໄຫວທາງການທະຫານຢູ່ເມືອງອານ-ບັບ ແຂວງອາເລັບໂປ ທາງພາກເໜືອຊີຣີ ເຊິ່ງເປັນຖານທີ່ໝັ້ນສຳຄັນຂອງກຸ່ມ IS ໂດຍນັບແຕ່ຕອນຄ່ຳວັນທີ 4 ຫາຕອນຮຸ່ງເຊົ້າວັນທີ 5 ກຸມພານີ້ ໄດ້ຍິງປືນໃຫຍ່ ແລະ ໂຈມຕີທາງອາກາດຕໍ່ເປົ້າໝາຍກຸ່ມ IS ຢູ່ເຂດດັ່ງກ່າວ ແລະສາມາດສັງຫານຜູ້ປະກອບອາວຸດຂອງກຸ່ມດັ່ງກ່າວໄດ້ 33 ຄົນ.