ສະຖານກົງສຸນໃຫຍ່ຈີນປະຈຳໂກຕາກີນາບາລູ ຢືນຢັນໃນວັນທີ 6 ກຸມພານີ້ວ່າ ຜູ້ເສຍຊີວິດທີ່ພົບຢູ່ເຂດທະເລໃກ້ເກາະເມງກາລຸມ ລັດຊາບາ ໃນວັນທີ 4 ກຸມພານີ້ແມ່ນນັກທ່ອງທ່ຽວຍິງຊາວຈີນ ທີ່ໄດ້ຫາຍສາບສູນໃນເຫດການເຮືອຫຼົ້ມກ່ອນໜ້ານີ້.
ທັງນີ້, ເຈົ້າໜ້າທີ່ຕຳຫຼວດລັດຊາບາ ປະເທດມາເລເຊຍ ຢືນຢັນວ່າ: ຫຼັງກວດ DNA ແລ້ວຈຶ່ງໄດ້ຮູ້ອັດຕະລັກຂອງຜູ້ປະສົບເຄາະຮ້າຍດັ່ງກ່າວ ແລະປັດຈຸບັນ, ເຈົ້າໜ້າທີ່ຕຳຫຼວດໄດ້ແຈ້ງໃຫ້ຄອບຄົວຜູ້ປະສົບເຄາະຮ້າຍຊາບແລ້ວ. ຈາກການຢືນຢັນດັ່ງກ່າວ, ສົ່ງຜົນເຮັດໃຫ້ມີນັກທ່ອງທ່ຽວຈີນເສຍຊີວິດ 4 ຄົນແລ້ວ ແລະປັດຈຸບັນຍັງມີນັກທ່ອງທ່ຽວຈີນ 4 ຄົນແລະລູກເຮືອ 1 ຄົນຫາຍສາບສູນໃນເຫດການເຮືອຫຼົ້ມດັ່ງກ່າວ
ທ່ານອາດາມ ອາຊິສ ເຈົ້າໜ້າທີ່ອົງການປະຕິບັດກົດໝາຍທາງທະເລປະຈຳລັດຊາບາ ກ່າວໃນວັນທີ 6 ກຸມພານີ້ວ່າ: ຈະສືບຕໍ່ຄົ້ນຫາຜູ້ຫາຍສາບສູນ ແລະໃນວັນດັ່ງກ່າວກໍສາມາດຄົ້ນຫາໃນບໍລິເວນກວ້າງ 2.000 ກິໂລຕາແມັດ.
