ເນື່ອງຈາກບໍ່ພໍໃຈຕໍ່ເງິນເດືອນແລະເງິນລາງວັນຂອງຕົນ, ພະນັກງານຈາກບໍລິສັດ ASM 300 ຄົນທີ່ຮັບຜິດຊອບການກວດກາກະເປົ໋າເດີນທາງດ້ວຍ X-Ray ປະຈຳສະໜາມບິນສາກົນສຸວັນນະພູມ ນະຄອນຫຼວງບາງກອກປະເທດໄທ ໄດ້ເລີ່ມນັດຢຸດງານໃນຕອນຄ່ຳວັນທີ 5 ກຸມພານີ້ ສົ່ງຜົນເຮັດໃຫ້ບາງຖ້ຽວບິນອອກເມືອງໄດ້ຮັບຜົນກະທົບ, ແຕ່ການຢຸດງານຄັ້ງນີ້ໄດ້ສິ້ນສຸດລົງໃນຕອນເຊົ້າວັນທີ 6 ເດືອນດຽວກັນ.
ທັງນີ້, ເວລາປະມານ 22:30 ໂມງຂອງວັນທີ 5 ກຸມພານີ້, ພະນັກງານທີ່ຮັບຜິດຊອບກວດກາກະເປົ໋າເດີນທາງດ້ວຍ X-Ray 300 ຄົນໄດ້ເຕົ້າໂຮມກັນຢູ່ຊັ້ນໜຶ່ງຂອງອາຄານຜູ້ໂດຍສານ ສະໜາມບິນສາກົນສຸວັນນະພູມ ໂດຍອ້າງເງິນເດືອນຕ່ຳໂພດ ທັງບໍ່ມີເງິນລາງວັນໃນທ້າຍປີ ຈຶ່ງຮຽກຮ້ອງໃຫ້ບໍລິສັດ ASM ທີ່ຕົນສັງກັດນັ້ນປະຕິບັດຕາມຄຳໝັ້ນສັນຍາຈ່າຍເງິນເດືອນແລະເງິນສະຫວັດດີການທີ່ຕົນໄດ້ໃຫ້ໄວ້.
ຈາກນັ້ນ, ເຈົ້າໜ້າທີ່ຄຸ້ມຄອງບໍລິສັດ ASM ກໍໄດ້ເຈລະຈາ ແລະ ຫາລືຢ່າງລະອຽດກັບພະນັກງານຢຸດງານ ຈຶ່ງເຮັດໃຫ້ການຢຸດງານຄັ້ງນີ້ສິ້ນສຸດລົງໃນເວລາປະມານ 8:00 ໂມງຂອງມື້ຕໍ່ມາ ແລະ ເນື່ອງຈາກການແກ້ໄຂບັນຫາໄດ້ທັນການ ຈຶ່ງເຮັດໃຫ້ການຢຸດງານບໍ່ໄດ້ສົ່ງຜົນກະທົບຫຼາຍປານໃດຕໍ່ຜູ້ໂດຍສານໃນສະໜາມບິນດັ່ງກ່າວ.