ກອງປະຊຸມໜ່ວຍງານປະສົມຣັດເຊຍ, ຕວກກີ ແລະ ອີຣານເພື່ອຕິດຕາມການຢຸດຍິງຢູ່ຊີຣີຄັ້ງທຳອິດໄດ້ຈັດຂຶ້ນຢູ່ນະຄອນຫຼວງອາສຕານາ ປະເທດກາຊັກສະຖານ ໃນວັນທີ 6 ກຸມພານີ້ ແລະໃນພິທີຖະແຫຼງຂ່າວຫຼັງສຳເລັດກອງປະຊຸມດັ່ງກ່າວ, ທ່ານກາດຊີມາໂກເມດົຟ ຫົວໜ້າຄະນະຜູ້ແທນຣັດເຊຍ ກ່າວວ່າ: ບັນດາຝ່າຍທີ່ຮ່ວມປະຊຸມ ໄດ້ປຶກສາຫາລືສະພາບການປະຕິບັດຕາມສັນຍາຢຸດຍິງຊີຣີ, ກົນໄກການຕິດຕາມການຢຸດຍິງທີ່ມີຜົນ, ການແຈກຢາຍເຄື່ອງຂອງທາງມະນຸດສະທຳ, ການສ້າງຄວາມໄວ້ເນື້ອເຊື່ອໃຈກັນລະຫວ່າງລັດຖະບານຊີຣີແລະບັນດາຝ່າຍຕໍ່ຕ້ານ ແລະບັນຫາອື່ນໆ. ຂະນະດຽວກັນ, ບັນດາຝ່າຍທີ່ຮ່ວມປະຊຸມຍັງສະເໜີໃຫ້ລັດຖະບານຊີຣີ ແລະ ຝ່າຍຕໍ່ຕ້ານ ສ້າງໜ່ວຍງານ ເພື່ອຮ່ວມກັນຮ່າງລັດຖະທຳມະນູນຊີຣີສະບັບໃໝ່.
ທ່ານກາດຊີມາໂກເມດົຟ ກ່າວຕື່ມວ່າ: ຣັດເຊຍແລະອີຣານຕ່າງກໍໄດ້ສ້າງສູນຕິດຕາມການຢຸດຍິງແລ້ວ ເຊິ່ງສູນສອງແຫ່ງກໍໄດ້ແລກປ່ຽນສະພາບການລະເມີດສັນຍາການຢຸດຍິງໃນແຕ່ລະມື້. ຂະນະທີ່ກຸ່ມກໍ່ການຮ້າຍສາກົນຫຼອນໂຈມຕີກອງທັບຊີຣີ ແລະ ກອງປະກອບອາວຸດຕ້ານລັດຖະບານ ພວມເປັນການລົບກວນການປະຕິບັດສັນຍາຢຸດຍິງ.
ກອງປະຊຸມໜ່ວຍງານປະສົມຄັ້ງໜ້າ ຈະຈັດຂຶ້ນຢູ່ນະຄອນຫຼວງອາສຕານາ ປະເທດກາຊັກສະຖານ ແຕ່ວັນທີ 15 ຫາວັນທີ 16 ກຸມພານີ້.
