ສະມາຄົມນັກທຸລະກິດສົ່ງອອກເຂົ້າສານໄທຢືນຢັນໃນວັນທີ 4 ກຸມພານີ້ວ່າ: ປີຜ່ານມາ, ໄທໄດ້ສົ່ງອອກເຂົ້າສານ 9 ລ້ານ 8 ແສນ 8 ໝື່ນໂຕນ ເພີ່ມຂຶ້ນ 0,9% ເມື່ອທຽບໃສ່ປີ 2015 ແລະບັນລຸມູນຄ່າສົ່ງອອກກວ່າ 4 ຕື້ 400 ລ້ານໂດລາສະຫະລັດ ຈາກປະລິມານການສົ່ງອອກດັ່ງກ່າວໄດ້ກາຍເປັນອັນດັບສອງຂອງໂລກ ຖັດຈາກອິນເດຍທີ່ສົ່ງອອກ 10 ລ້ານ 4 ແສນ 3 ໝື່ນໂຕນ.
ກ່ອນໜ້ານີ້, ລັດຖະບານໄທຄາດວ່າ ປີ 2016 ຈະບັນລຸການສົ່ງອອກເຂົ້າສານກວ່າ 10 ລ້ານໂຕນ, ແຕ່ຕົວເລກຫຼ້າສຸດຄືດັ່ງກ່າວຊີ້ໃຫ້ເຫັນເຖິງການບໍ່ບັນລຸຕາມເປົ້າໝາຍ. ແນວໃດກໍດີ, ສະມາຄົມສົ່ງອອກເຂົ້າສານໄທຊີ້ວ່າ: ປີນີ້, ການສົ່ງອອກເຂົ້າສານໃນຕະຫຼາດໂລກຈະແຂ່ງຂັນດຸເດືອດກວ່າເກົ່າ ເນື່ອງຈາກຫຼາຍປະເທດສົ່ງອອກເຂົ້າສານຈະເພີ່ມຜົນຜະລິດ, ຂະນະທີ່ປະເທດນຳເຂົ້າເຂົ້າສານພັດມີຄວາມຕ້ອງການຫຼຸດໜ້ອຍລົງ ເຮັດໃຫ້ລາຄາເຂົ້າສານຖືກລົງ. ຈາກນີ້ຈຶ່ງໄດ້ຕັ້ງເປົ້າສົ່ງອອກເຂົ້າສານໃນປີນີ້ 9 ລ້ານ 5 ແສນໂຕນ.