ທ່ານເດວຟິນ ໂລເຣນຊານາ ລັດຖະມົນຕີກະຊວງປ້ອງກັນປະເທດຟິລິບປິນກ່າວໃນວັນທີ 7 ກຸມພານີ້ວ່າ: ທ່ານໂຣດຣີໂກ ດູເຕີເຕ ປະທານາທິບໍດີປະເທດຕົນໄດ້ເຫັນດີໃຫ້ກອງທັບອາເມລິການຳໃຊ້ຖານທັບປະຈຳຟິລິບປິນແລະຕິດຕັ້ງອຸປະກອນ ຫຼື ກໍ່ສ້າງສິ່ງປຸກສ້າງການທະຫານ ຕາມສັນຍາລະຫວ່າງສອງປະເທດ, ແຕ່ຫ້າມບໍ່ໃຫ້ກອງທັບອາເມລິກາຮັກສາອາວຸດໄວ້ໃນຖານທັບເຫຼົ່ານີ້.
ກະຊວງປ້ອງກັນປະເທດຟິລິບປິນເຄີຍປະກາດໃນເດືອນມັງກອນຜ່ານມາວ່າ: ປີນີ້, ກອງທັບອາເມລິກາຈະເລີ່ມສ້າງສິ່ງປຸກສ້າງການທະຫານ ລວມທັງສາງມ້ຽນເຄື່ອງ ແລະ ທາງຂຶ້ນລົງສຳລັບເຮືອບິນ ໃນຖານທັບທີ່ໄດ້ເລືອກໄວ້.
ຂ່າວແຈ້ງອີກວ່າ, ລັດຖະທຳມະນູນຟິລິບປິນໄດ້ລະບຸຢ່າງຈະແຈ້ງວ່າ ຫ້າມບໍ່ໃຫ້ກອງທັບຕ່າງປະເທດສ້າງຖານທັບຢູ່ປະເທດຕົນ, ແຕ່ "ສັນຍາການເພີ່ມທະວີການຮ່ວມມືດ້ານການປ້ອງກັນປະເທດ" ໄດ້ອະນຸຍາດໃຫ້ກອງທັບອາເມລິການຳໃຊ້ຖານທັບຟິລິບປິນ, ຕິດຕັ້ງອຸປະກອນ ຫຼື ກໍ່ສ້າງສິ່ງປຸກສ້າງການທະຫານ ແລະສາມາດຮັກສາໄວ້ໄດ້ ລວມທັງຕິດຕັ້ງອາວຸດ. ນອກນີ້, ເມື່ອເດືອນມີນາປີ 2016, ຟິລິບປິນແລະອາເມລິກາໄດ້ອອກຖະແຫຼງການຮ່ວມ ໂດຍລະບຸວ່າ ກອງທັບອາເມລິກາສາມາດນຳໃຊ້ຖານທັບ 5 ແຫ່ງຢູ່ຟິລິບປິນໄດ້.