ທ່ານອັນໂຕນ ໂບເອີເນີ ປະທານສະມາຄົມຂາຍຍົກແລະການຄ້າຕ່າງປະເທດເຢຍລະມັນ ໄດ້ຖະແຫຼງໃນວັນທີ 7 ກຸມພານີ້ ໂດຍໄດ້ຕຳໜິທ່ານໂດນັນ ທຣຳ ປະທານາທິບໍດີອາເມລິກາຢ່າງຮ້າຍແຮງ ຫຼັງມົວເມົານຳນະໂຍບາຍການປົກປ້ອງການຄ້າ ທັງເຫັນວ່າການກະທຳແບບນີ້ຈະສົ່ງຜົນເຮັດໃຫ້ເສດຖະກິດໂລກຖົດຖອຍ ທີ່ບໍ່ສາມາດຫຼີກເວັ້ນໄດ້.
ທ່ານໂບເອີເນີ ກ່າວວ່າ: ທ່ານທຣຳໄດ້ຮັບໄຊຊະນະໃນການເລືອກຕັ້ງປະທານາທິບໍດີ ກໍສົມດັ່ງປາຖະໜາທີ່ຖືເອົາອາເມລິກາເປັນບໍລິສັດຂອງຕົນເອງ. ຂະນະທີ່ຖ້າວ່າໃນຕໍ່ໜ້າ ທ່ານສາມາດປະຕິບັດຕາມຄວາມຄິດຂອງຕົນທີ່ສ້າງກຳແພງການຄ້າໃໝ່ ໂດຍສະເພາະຈະປະຕິບັດຕໍ່ຈີນນັ້ນ ກໍຈະສົ່ງຜົນໃຫ້ເສດຖະກິດເຢຍລະມັນທີ່ເນັ້ນການສົ່ງອອກຖືກກະທົບແບບມະຫັນຕະໄພ ແລະເມື່ອເປັນແນວນີ້, ເສດຖະກິດໂລກກໍຈະຖົດຖອຍ ໂດຍຈະຫຼີກເວັ້ນບໍ່ໄດ້.
ທ່ານໂບເອີເນີ ກ່າວຕື່ມວ່າ: ຄຽງຄູ່ກັບທ່ານທຣຳຂຶ້ນເປັນຜູ້ກຳອຳນາດ, ເຢຍລະມັນກໍຄວນພິຈາລະນາການສ້າງພັນທະມິດໃໝ່ກັບປະເທດໃນອາຊີ, ອາເມລິກາລາຕິນ ແລະ ການາດາ ເຊິ່ງຖ້າເປັນຈິງກໍຈະສົ່ງຜົນເຮັດໃຫ້ອາເມລິກາຜະເຊີນກັບການແຂ່ງຂັນຢ່າງດຸເດືອດທີ່ສຸດ.