ຄະນະກຳມາທິການສະຫະພາບເອີຣົບ ໄດ້ເຜີຍແຜ່ບົດລາຍງານຄວາມຄືບໜ້າການຈັດສັນຊາວອົບພະຍົບສະບັບທີ 9 ໃນວັນທີ 8 ກຸມພານີ້ ໂດຍສະແດງໃຫ້ເຫັນວ່າ, ນັບແຕ່ວັນທີ 8 ທັນວາປີຜ່ານມາຈົນເຖິງປັດຈຸບັນ, ໂດຍລວມແລ້ວມີຊາວອົບພະຍົບ 3.813 ຄົນ ໄດ້ຍ້າຍຈາກເກຼັກ ແລະ ອີຕາລີ ໄປຢູ່ປະເທດສະມາຊິກອື່ນໆ ໃນນີ້ ສຳລັບເດືອນທັນວາປີຜ່ານມາໄດ້ຍ້າຍຊາວອົບພະຍົບຫຼາຍທີ່ສຸດ ເຖິງ 1.926 ຄົນ. ຂະນະທີ່ນັບແຕ່ເດືອນກັນຍາປີ 2015 ເປັນຕົ້ນມາ, ສະຫະພາບເອີຣົບໄດ້ຍົກຍ້າຍຊາວອົບພະຍົບຈາກສອງປະເທດດັ່ງກ່າວແລະຈັດສັນໄປຢູ່ປະເທດສະມາຊິກອື່ນໆ 11.966 ຄົນ, ແຕ່ຄວາມຄືບໜ້າດັ່ງກ່າວຊ້າກວ່າເປົ້າໝາຍທີ່ວາງໄວ້ຫຼາຍສົມຄວນ.
ນອກຈາກຍົກຍ້າຍຊາວອົບພະຍົບອອກຈາກເກຼັກ ແລະ ອີຕາລີ ແລ້ວ, ປະເທດສະມາຊິກສະຫະພາບເອີຣົບເຄີຍຮັບປາກວ່າຈະຈັດສັນຊາວອົບພະຍົບໃນປະເທດຕ່າງໆໃຫ້ໄດ້ 22.000 ຄົນກ່ອນເດືອນກັນຍາປີນີ້. ຂະນະທີ່ບົດລາຍງານດັ່ງກ່າວສະແດງໃຫ້ເຫັນວ່າ, ມາຮອດປັດຈຸບັນ, ມີຊາວອົບພະຍົບ 13.968 ຄົນໄດ້ຮັບການຈັດສັນແລ້ວ.