ກະຊວງໂຍທາທິການແລະຂົນສົ່ງກຳປູເຈຍ ໄດ້ຢືນຢັນໃນວັນທີ 8 ກຸມພານີ້ວ່າ ຈະວາງແຜນກໍ່ສ້າງລົດໄຟລອຍຟ້າເພື່ອແກ້ໄຂບັນຫາການສັນຈອນແອອັດໃນນະຄອນຫຼວງພະນົມເປັນ ແລະຈະມອບໃຫ້ອົງການຮ່ວມມືສາກົນຍີ່ປຸ່ນ(Japan International Cooperation Agency) ຫຼື ໄຈກາ ສຶກສາຄວາມເປັນໄປໄດ້ຂອງໂຄງການ.
ທ່ານຊຸນຈັນທອນ ລັດຖະມົນຕີກະຊວງໂຍທາທິການແລະຂົນສົ່ງກຳປູເຈຍ ກ່າວວ່າ: ລົດໄຟລອຍຟ້າຕ້ອງການພື້ນທີ່ອ່າວໜ້ອຍ, ການອອກແບບກໍເປັນມິດຕໍ່ສິ່ງແວດລ້ອມ ແລະ ຈະບໍ່ປ່ອຍຄວັນທີ່ເປັນສິ່ງມົນລະພິດ. ຂະນະທີ່ຫຼັງສຳເລັດບົດລາຍງານການສຶກສາຄວາມເປັນໄປໄດ້ແລ້ວ, ລັດຖະບານຍັງຈະຕ້ອງລະດົມທຶນ 800 ລ້ານໂດລາສະຫະລັດເພື່ອໃຊ້ໃນໂຄງການດັ່ງກ່າວ.
ຂະນະທີ່ໂຄສົກກະຊວງໂຍທາທິການແລະຂົນສົ່ງກຳປູເຈຍ ກ່າວວ່າ: ຍີ່ປຸ່ນອາດຈະເລີ່ມສຶກສາຄວາມເປັນໄປໄດ້ໃນເດືອນເມສາທີ່ຈະເຖິງນີ້ ແລະຄາດວ່າຈະສຳເລັດບົດລາຍງານໃນເດືອນພຶດສະພາປີໜ້າ. ແນວໃດກໍດີ, ແຜນການກໍ່ສ້າງລົດໄຟລອຍຟ້າແມ່ນໂຄງການສຳຄັນຂອງລັດຖະບານໃນການຊຸກຍູ້ລະບົບຂົນສົ່ງສາທາລະນະ ເພື່ອແກ້ໄຂບັນຫາການສັນຈອນນັບມື້ແອອັດໃນນະຄອນຫຼວງພະນົມເປັນ.