ສື່ມວນຊົນຝຣັ່ງລາຍງານວ່າ ເຂດໂຮງໄຟຟ້ານິວເຄລຍຟລາມັງວິວເລີ ຢູ່ແຂວງລາມັງເຊີ ທາງພາກຕາເວັນຕົກຝຣັ່ງໄດ້ເກີດລະເບີດໃນຕອນເຊົ້າວັນທີ 9 ກຸມພານີ້ ສົ່ງຜົນເຮັດໃຫ້ 5 ຄົນບາດເຈັບເລັກໜ້ອຍ, ແຕ່ບໍ່ເປັນອັນຕະລາຍຈາກການຮົ່ວໄຫຼຂອງສານກຳມັນຕະພາບລັງສີ.
ທັງນີ້, ສື່ມວນຊົນຝຣັ່ງໄດ້ອ້າງຕາມແຫຼ່ງຂ່າວຈາກອຳນາດການປົກຄອງທ້ອງຖິ່ນແລະໂຮງໄຟຟ້ານິວເຄລຍວ່າ ເຫດລະເບີດເທື່ອນີ້ເກີດຂຶ້ນຍ້ອນຜົນກະທົບຈາກໄຟໄໝ້, ແຕ່ບໍ່ໄດ້ເກີດຂຶ້ນຢູ່ເຂດໃຈກາງຂອງໂຮງໄຟຟ້າ ຈຶ່ງບໍ່ເປັນອັນຕະລາຍຈາກການຮົ່ວໄຫຼຂອງສານກຳມັນຕະພາບລັງສີ. ດ້ວຍເຫດນີ້, ອຳນາດການປົກຄອງທ້ອງຖິ່ນຈຶ່ງບໍ່ໄດ້ໃຊ້ມາດຕະການເປັນພິເສດ ແລະພຽງແຕ່ສົ່ງກອງດັບເພີງທຳມະດາເຂົ້າໄປແກ້ໄຂບັນຫາເທົ່ານັ້ນ.
ນອກນີ້, ຂ່າວຫຼ້າສຸດຈາກແຂວງລາມັງເຊີ ໃຫ້ຮູ້ວ່າ: ເຫດໄຟໄໝ້ເທື່ອນີ້ໄດ້ເກີດຂຶ້ນໃນເວລາປະມານ 10:00 ໂມງຂອງວັນທີ 9 ກຸມພານີ້ ເຊິ່ງສາເຫດອາດຈະແມ່ນໄຟຟ້າລັດວົງຈອນ, ຂະນະທີ່ຍັງຊອກຫາສາເຫດທີ່ລະອຽດ ແລະປັດຈຸບັນ ເຄື່ອງປະຕິກອນເບີ 1 ຂອງໂຮງໄຟຟ້າດັ່ງກ່າວໄດ້ຢຸດເຮັດວຽກແລ້ວ.
